Izaya 23 - Mukanda Wa Zambi 1970

Maliji hakutwala ku Fenishia

¹ Jino lili sango ja mu limbo lia Tiru. Yenu akwa kwendesa mato ha kulunga lwiji, lilenu mbimbi mumu Tiru, chau cha ku mahienu, hachenyeka, ni mazuwo ni zuzu haayishiha. Muze mato jenu maakatuka ku hongo lia Shipre nikuhiluka ku mahienu munwivwa sango jino.

² Holenu, kujakangana, yenu akwa kusepa a mu limbo lia Sidone! Te nwakutuma atu,

³ ku kalunga lwiji ni kulanda ni kulanjisa chivwale chumu mu chifuchi cha Egiptu, ni kusepa ni mavungu eswe.

⁴ Limbo lia Sidone sonyi hijakukwata! Kalunga lwiji hakwehuka nikwamba ngwenyi: “Kanda ngubwa kama ni amwe ana. Kanda ngulela kama ana a malunga ni a mapwo.”

⁵ Chibwe akwa Egiptu kumaakalishimwoka ni kunenganyana muze meevwa ngwo, Tiru haamwonona.

⁶ Yenu Afenishia, lilenu mbimbi! Esekenu kuchinyina ku chifuchi cha Espanya.

⁷ Kuma, lino lili limbo lia uwahilio Tiru, lize atungile ku shakulu, nyi? Kuma lino lili limbo lize liatumine atu jalio musali lia kalunga lwiji atunge yihunda yo, nyi?

⁸ Iya wakokele yuma yino ha Tiru, limbo lia lufuma lize te likwete mianangana akwa kusepa, akwa lufuma kuhiana hano hashi?

⁹ Mwene Zambi Mukwa Ndundo Jeswe mwe wayikokele. Hachilinga nikusulisa kulengumuka cho ni kulelesa atu alemu jo eswe.

¹⁰ Yeenu nulime minda yenu, yenu waze nwatungile mu sali mu chifuchi cha Espanya! Kukushi niumwe yoze makanufunga nawa.

¹¹ Mwene Zambi hanolola moko jenyi ha kalunga lwiji ni kukumba mawanangana. Hahana Shimbi ya kwonona membo akusepela mu Fenishia.

¹² Limbo lia Sidone, uwahililo we hiwasula, atu je kaanaabinjisa kuli akwa kole jo. Chibwe atu je maachinyina ku Shipre, keechi kawana ko uhwimino.

¹³ (Chabwile Ababilonia, hi Aasuria ko, waze echele tushitu a mu yambu kunjila mu Tiru. Ababilonia e atungile ko mazuwo asuku akukoleka alimike ni Atiru, e abuzwile chipanga chakukoleka ni yahichika limbo liakwenyeka.)

¹⁴ Lilenu mbimbi yenu akwa kwendesa mato ha kalunga lwiji! Limbo lize te nwakushachila haalibuzula.

¹⁵ Tangwa mulikeza lize atu maakavulama Tiru miaka makumi shimbiali, ngwe matangwa a mwono wa mwanangana umuwika. Mwabwamuze Tiru makabwa ngwe chitanji mu umwe mwaso ngwo:

¹⁶ Yena chitanji haakuvulama! Anda kalialia, jinga chihunda. Imba nawa miaso ye hanga akwiwuluke.

¹⁷ Muze miaka makumi shimbiali hiyahwa, Mwene Zambi matayiza nawa Tiru kuhiluka ku milimo yenyi ya kusepa. Neye malihana nawa ku mawanangana a hashi eswe.

¹⁸ Hohene ubite wenyi uze makasepa, makaukunjika kuli Mwene Zambi. Kechi kayisweka nawa, alioze waze akuwayila Mwene Zambi eno maakalianyina ubite wenyi ni kulatula yakulia ni mahina nikulita ni kuhona cho.