Izaya 22 - Mukanda Wa Zambi 1970

Maliji hakutwala ku Yerusaleme

¹ Jino jili sango ja chikulo cha Usolwelo. Mumu yika atu eswe a mu limbo anawahilila ha mafulumba ja mazuwo?

² Akwa limbo eswe kaanatumbwoka ni zungo. Malunga jenu waze afwile mu jita yino kaafwile ko ni mikwale.

³ Miata jenu a tujita eswe kaanakachina; yaakwata muze te kanda achaasa chibwe mivwi.

⁴ Haliabwila ngwechenu ngulile ukawami atu jami eswe waze haashiha. Kanda nweseka kungulembejeka.

⁵ Lino lili tangwa lia kubinda, ni lia kufwa, ni lia kutatajala mu chikulo cha Usolwelo, ni Mwene Zambi Mukwa Ndundo Jeswe hayituma hali yetu. Yipanga ya limbo lietu hiyabuzuka, kuteta haachivwa hakachi ka milundu.

⁶ Tujita a ku chifuchi cha Elame yeeza ha tuvwalu, ni mata jo a kwasa ni mivwi. Tujita a ku chifuchi cha Kire haanalulieka kulu kebwe jo.

⁷ Yikulo ya mu Yuda ya chinuno yiizala ni matemba, tujita waze akwendela ha tuvwalu yaamana ku yikolo ya Yerusaleme.

⁸ Ayuda eswe yaalezumuka. Munwabwamuze yinwanda yitwa ya jita ya mu zuwo lia “Usaki wa Libano.”

^9-10 Yinuwana kuma kuze kunabuzuka yipanga ya Yerusaleme yinatela kululika. Yinwendesa mazuwo eswe a mu Yerusaleme, yinububa amwe, yinwanda e mawe ni kululika no yipanga ya limbo. Mumu ha lamba lia meya,

¹¹ yinutunga chitende mu limbo cha kufunga meya waze maatuhuka mu chitende chikulu. Alioze kunwashinginyekene ko Zambi, yoze walulikile yuma yize yeswe chize ku shakulu, yoze wayimanunwine.

¹² Ha tangwa lize Mwene Zambi Mukwa Ndundo Jeswe anutambikile ni kulila, ni kulishimwoka, ni kutewula kambu jenu, ni kuzala mianji.

¹³ Alioze kuma, yinusehejela, yinuwahilila. Yinushiha mapanga ni ngombe ya kulia, yinunwa vinyu. Yinwamba ngwenu: “Tulienu, tunwenu! Hamene mutufwa.”

¹⁴ Mwene Zambi Mukwa Ndundo Jeswe yangwamba ngwenyi: “Uhenge uno kechi kaakonekena wo ndoo ku miaka yeswe ya mwono wo. Yami, Mwene Zambi Mukwa Ndundo Jeswe nachamba.”

Mukwa munanyi yakanyamisa Shebna

¹⁵ Mwene Zambi Mukwa Ndundo Jeswe hangwamba nguye kuli Shebna, kavumbi ka zuwo lia mwanangana, nikumwamba ngwami:

¹⁶ “Unanyongo ngwe yena uli iya? Mumu yika hiwalilulikila fuka mu liwe muno mu mulundu?

¹⁷ Wakulinyonga kubwa mutu mulemu, alioze Mwene Zambi makwanda, makumbila lume.

¹⁸ Makwasa ngwe ndundu ni kukumbila mu chifuchi chinene. Kwenako muukafwila hehi ni matemba waze unalisutu no. Yena unaneha sonyi ku zuwo lia kakenu.

¹⁹ Mwene Zambi makakuchiza ku milimo ye yilemu ni kukunyasa hashi.”

²⁰ Mwene Zambi yambila Shebna ngwenyi: “Ha tangwa lize mungutambika kavumbi kami Eliakime mwana wa Hilkia.

²¹ Mungukamujika hina lie ni muya we wa wanangana, ni kumwaha chiyulo cheswe cha yena. Neye makabwa ngwe tato ya akwa Yerusaleme ni Ayuda.

²² Mungukamwaha chiyulo cha wanangana, shina mwanangana wa ku vungu lia David mwe makamuhiana. Makabwa ni sapi ja tachi; kashika chize makakasulula niumwe kechi kachikasa, ni chize makakasa niumwe kechi kachikasulula.

²³ Mungukamukolesa ngwe lumbambo, mba akwa jiko lienyi eswe maakaalemesa mumu hali iye.

²⁴ “Alioze usoko wenyi eswe, ni eswe waze akushachila hali iye, maakamubikalisa kuhiana. Maakamuzezeleka misenge ni milondo ngwe yinazezala ku lumbambo!

²⁵ Hohene lumbambo yoze akolesele makasokoka ni kuholoka. Yuma yeswe yize amuzezelekele, neyo muyikafwa.” Mwene Zambi hachamba.