Izaya 21 - Mukanda Wa Zambi 1970

Usolwelo: kubuzula cha Babilone

¹ Jino jili sango ja mu limbo lia Babilone. Ngwe chize chijimbi chinabalika mu puya, Chenacho nawa lamba mulikatuka mu chifuchi cha yiswii.

² Namwene Usolwelo wa yuma yikalu, Usolwelo wa ulembekese ni wa kububa. Tujita a ku chifuchi cha Elame, asenu jita! Tujita a ku chifuchi cha Media, hamikenu ni akwa membo! Ababilonia haabinjisa atu anji, alioze Zambi himasa songo ku kubinjisa cho.

³ Muze hinevwa ni hinamona Usolwelo uno, yingwivwa woma ngwe pwo yoze Unevu musongo wa kusema.

⁴ Mbunge yami yinabinji, ngunachikima ni woma. Nevwa kuwaha kuya tulo ha ufuku, alioze tulo ku meso kejile ko, shina woma.

⁵ Mu Usolwelo yingumona mesa te yakwala kulu; haala ko mahina abema atwame ho. Atu te kaanali, kaananu. Susumuku yeevwa mutambi ngwo: “Miata a tujita! Lulikenu kebwe jenu!”

⁶ Mba Mwene Zambi yangwamba ngwenyi: “Yako use kafunga, akulweze chize mamona.

⁷ Nyi ngwe wamona atu anendela ha tuvwalu, aali aali, ni atu anendela ha yimbulu ni ha tumelu, waashishikisa kanawa.”

⁸ Mwe kafunga yakololoka ngwenyi: “Mwene, ngunakamana ha muhela wami mwalwa ni ufuku.”

⁹ Susumuku, kaaneza! Malunga kaaneza aali aali ha tuvwalu, Kafunga kanambulula sango ngwenyi: “Babilone habuzuka! Mahamba eswe waze te akukombelela haabuzwokela hashi.”

¹⁰ Atu jami Aisraele, yenu nuli ngwe mbuto yize haazungula, Alioze haliabwila hinanwambulwila sango jibema jize hinevwa kuli Mwene Zambi Mukwa Ndundo Jeswe, Zambi ya Aisraele.

Maliji hakutwala kuli Aedome

¹¹ Jino jili sango ja mu chifuchi cha Edome. Umwe mutu wa ku Edome yangutambika ngwenyi: “Kafunga, shimbu lika ufuku muucha? Shimbu lika mukubatwoka?”

¹² Yingukumbulula ngwami: “Kwilu himukucha, alioze kumukutoka nawa. Nyi unazange kuhula nawa, wiza nawa uhule.”

Maliji hakutwala kuli Aarabia

¹³ Jino jili sango ja mu chifuchi cha Arabia. Yenu akwa Dedane, nwakujika misumba yenu mu puya ya mu chifuchi cha Arabia.

¹⁴ Atu waze anevu pwila aneza kuli yenu ahenu meya. Yenu akwa limbo lia Tema hanenu meya kuli waze hachina.

¹⁵ Atu kaanachina waze anambe kwashiha ni mikwale, ni mata a kwasa; kaanachina ku utende weswe wa jita.

¹⁶ Mba Mwene Zambi yangwamba ngwenyi: “Ha mwaka umuwika lume ulemu wa mavungu ja ku Kedare kumuukahwa.

¹⁷ Akwa mata a kwasa a Kedare te akwa hamu, alioze shina akepe a kuli ayo maasala. Yami, Mwene Zambi ya Aisraele, nachamba.”