Izaya 20 - Mukanda Wa Zambi 1970

Chilayi: mukwa munanyi uselesele

¹ Sargone, mwanangana wa Asuria, yatuma mwata wa tujita ni kwasa jita ni Afilistia ku limbo lia Ashdode

² Te hikwabalika kulu miaka yitatu, Mwene Zambi yambila Izaya, mwana wa Amoze, ngwenyi: “Yako uzule sapato ni mwanji yize unazala.” Neye yononoka, yaya uselesele.

³ Muze Aasuria haakumba akwa Ashdode, Mwene Zambi yamba ngwenyi: “Kavumbi kami Izaya, kanende uselesele miaka yitatu. Chili chilayi chinalumbununa chize muchikabwa ku Egiptu ni ku Sudane.

⁴ Mwanangana wa Asuria makatwala akwa Egiptu ni akwa Sudane funge uselesele. Akweze ni makulwana meenda uselesele matako haze, meevwa sonyi kuhiana.

⁵ Atu waze te haashachila hali Asudane ni waze haalisamba hakutwala kuli akwa Egiptu maatatajala ni kulishimwoka.

⁶ Muze tangwa lize mulikeza, atu waze akutwama ku mbumbulu ya kalunga lwiji mu Filistia maakamba ngwo: ‘Talenu chize haabwa atu waze twashachilile ha kutufunga, kuli mwanangana wa Asuria! Mba ngwe kuchi mutuchina?’ ”