Izaya 2 - Mukanda Wa Zambi 1970

Uhwimino wa miaka yeswe

¹ Mwene Zambi yalweza Izaya mwana wa Amoze maliji wano hakutwala ku chifuchi cha Yuda ni limbo lia Yerusaleme:

² Ha matangwa akusula mulundu wa zuwo lia Zambi muukabwa mulundu usuku kuhiana milundu yikwo yeswe. Mavungu anji maakeza ko;

³ mba maakamba ngwo: “Tukandukenu ha mulundu wa Mwene Zambi, ku zuwo lia Zambi ya Aisraele. Makatulongesa chize anazange tulinge; mutukendangana mu majila jenyi. Mumu longeso lia Mwene Zambi liakukatuka ku Yerusaleme, ku Zione kakuhanjika ni atu jenyi.”

⁴ Iye makabatula milonga ya mavungu a lufuma. No maakalumuna mikwale yo kubwa matemo a kulima no, ni makunga jo kubwa poko ja kululika najo mitondo ya mawundu. Mavungu keechi kasa nawa jita, chibwe kulilongesa yo.

⁵ Haliabwila yenu vungu lia Yakoba, tweyenu nwende mu pangu lize Mwene Zambi akutwaha!

Kuliumba cha akwa mavungu ku meso ja Mwene Zambi

⁶ Aa Zambi, hiunehuka atu je, vungu lia Yakoba! Chifuchi chili ni tahi anji a ku chivumbuko ni a ku chifuchi cha Filistia. Atu kaanembulula ndako ja mavungu.

⁷ Chifuchi cho hichazala ni prata ni oru; ubite unji ali nawo. Chifuchi cho hichazala ni tuvwalu, matemba jo hooka kuhiana, kuhasa ka kwalula.

⁸ Chifuchi cho hichazala ni mahamba, kaakuwayila yitanga ya moko jo.

⁹ Eswe maakahombola, eswe meevwisa sonyi. Mwene Zambi kanda wakonekena!

¹⁰ Maakaswama mu yivwenge ya mawe, hanji maakafula mena ni kweseka kuchina ufwatulo wa Mwene Zambi ni ndundo jenyi ni uhenya wenyi.

¹¹ Tangwa mulikeza lize Zambi makahombola atu ku kulengumuka ni ku kulisuta cho. Hohene Mwene Zambi wika makanangama.

¹² Ha tangwa lize Mwene Zambi Mukwa Ndundo Jeswe makahombola akwa tachi, ni akwa kulengumuka, ni akwa kulisuta eswe.

¹³ Makonona mitondo yisuku sedru ya mu chifuchi cha Libano, ni mitondo yeswe shene ya mu chifuchi cha Bashane.

¹⁴ Makasalamisa milundu yeswe yisuku ni mindundena yeswe,

¹⁵ nikwonona mazuwo eswe asuku ni yipanga yeswe yakukoleka.

¹⁶ Nikushimbamisa mato chibwe anene chibwe abema kuhiana.

^17-18 Zambi makahombola akwa kulengumuka ni akwa kulisuta eswe. Mahamba keechi kabwa ko nawa; shina Mwene Zambi wika mwe makanangama.

¹⁹ Atu maakaswama mu yivwenge ya mawe, hanji maakafula mena, mumu ha woma wa Mwene Zambi. Maakeseka kuchina ufwatulo wa Mwene Zambi ni ndundo jenyi ni uhenya wenyi muze makeza nikwomisa akwa hashi.

²⁰ Muze tangwa lize mulikeza, atu maakambila mahamba jo a prata ni oru waze alingile, maakaahichikila tumbi ni tufukufuku.

²¹ Muze Mwene Zambi makomisa akwa hashi, atu maakaswama mu mena ni mu yivwenge ya mawe, maakeseka kuchina ufwatulo wenyi ni ndundo jenyi ni uhenya wenyi.

²² Kanda ushachila nawa hali atu. Ulemu uka ali nawo.