Izaya 19 - Mukanda Wa Zambi 1970

Zambi makamwesa akwa Egiptu lamba

¹ Jino jili sango ja mu chifuchi cha Egiptu. Mwene Zambi makeza ku Egiptu, kaneza fuji ha lelwa. Mahamba ja mu Egiptu kaanachikima ku meso jenyi; akwa Egiptu kaanalekumuka.

² Mwene Zambi kanambe ngwenyi: “Mungukavundula enyembo ja akwa Egiptu hanga alimike ni usoko wo, mwenyembo ni mwenyembo wenyi. Akwa limbo limwe maakalimika ni akwa limbo likwo; umwe mwanangana makahamika ni mukwo.

³ Mungubinjisa manyonga ja akwa Egiptu ni kulekumuna mbunge jo. Kumaakahula mahamba jo ni kwakwasa; maakahula tahi; maakahula mana kuli afu.

⁴ Mungukakunjika akwa Egiptu kuli umwe mutu mukalu, kuli umwe mwanangana chiswii hanga aayule. Yami Mwene Zambi Mukwa Ndundo Jeswe nachamba.”

⁵ Meya akepe maabwa ko mu lwiji Nile, mwe lwiji kumeza kuma chau.

⁶ Tupila a mukachi ka njiji maakabwa ni vumba libi. Mbungu ni manenga muyikabola,

⁷ ni mbuto yeswe ya ku mbumbulu ya Nile kumuyikoma ni kuhehuka ni fuji.

⁸ Akwa kuta yishi maakalishimwoka ni kuteta; tuzambu two ni manda jo keechi kwakwasa nichimwe.

⁹ Atu waze akutunga mahina abema maakalekumuka.

¹⁰ Akwa kutunga Wanda ni akwa utotombo maakalinyenga ni kwivwa kubiha.

¹¹ Akwa lutwe a mu limbo lia Zoane kaali yihepuke! Akwa mana a mu Egiptu kaakulongesa yuma yamokomoko. Ngwe kuchi akwambila mwanangana ngwo, tuli akwa kuhinga ja akwa mana, ni mianangana a shakulu?

¹² Akwa mana jenu kuli ali? Amulweze manyonga ja Mwene Zambi Mukwa Ndundo Jeswe hakutwala ku Egiptu.

¹³ Akwa lutwe a mu Zoane ni Memfise kaali yihepuke. Ayo chaatamba kusongwela akwa chifuchi alioze haapiangula.

¹⁴ Mwene Zambi habinjisa mana ja akwa mana. Kashika akwa Egiptu kaakubihisa yuma yeswe; kakubebieka ngwe akwa kuzengewa waze akupiepieta mu yisajilo yo.

¹⁵ Mu Egiptu niumwe chibwe pichi hanji chiswale, chibwe mutu mulemu hanji mulelu, mahasa kwakwasa.

Akwa Egiptu maawayila Mwene Zambi

¹⁶ Tangwa mulikeza lize akwa Egiptu maakabwa ngwe mapwo. Kumaakachikima ni woma muze maakamona Mwene Zambi Mukwa Ndundo Jeswe kanazozo kwoko lienyi ni kwamwesa lamba.

¹⁷ Akwa Egiptu maakevwila Ayuda woma shimbu lieswe kaakwiwuluka manyonga ja Mwene Zambi Mukwa Ndundo Jeswe mumu hali ayo.

¹⁸ Muze tangwa lize mulikeza, mu membo atano a mu Egiptu atu maakahanjika hebreu. E atu maakalishinga mu jina lia Mwene Zambi Mukwa Ndundo Jeswe. Hakachi ka membo waze maakavuluka limwe ngwo: “Limbo lia Tangwa.”

¹⁹ Muze tangwa lize mulikeza, mukukabwa chilumbilo cha Mwene Zambi mu chifuchi cha Egiptu, ni liwe linene ku njiza ya Egiptu amwiwulule.

²⁰ Muyikabwa yinyingi ya Mwene Zambi Mukwa Ndundo Jeswe mu Egiptu. Muze e atu maakabinjisa kuli akwa kole jo, mba maakalila kuli Mwene Zambi aakwase, neye makaatumina umwe mutu ni kwalamwina.

²¹ Mwene Zambi makalisolola kuli akwa Egiptu, mba no maakamunyingika ni kumuwayila, ni kumunehena milambu ni yitapo. Maakalishinga ni yilakenyo ku meso jenyi, ni kulinga yize haalakenya.

²² Mwene Zambi makamwesa akwa Egiptu lamba alioze makaawuka nawa. Maakahiluka kuli iye, neye makevwa kulemba cho ni kwawuka.

²³ Muze tangwa lize mulikeza, hakachi ka Egiptu ni Asuria muhakabwa jila yinene. Akwa yifuchi yize yaali kumaakaliendela; kumaakawayila Mwene Zambi hamuwika.

²⁴ Muze tangwa lize mulikeza, Aisraele maakalichinga hamwe ni Egiptu ni Asuria, ni akwa yifuchi yino yitatu maakawahisa akwa hashi eswe.

²⁵ Mwene Zambi Mukwa Ndundo Jeswe makaawahisa nikwamba ngwenyi: “Yenu atu jami, akwa Egiptu, ni yenu Aasuria waze natangile, ni yenu Aisraele waze natongwele, mungunuwahisa.”