Izaya 18 - Mukanda Wa Zambi 1970

Zambi makamwesa Asudane lamba

¹ Musali lia njiji ja Sudane liji lia mapulwa kaanalivu.

² Chifuchi chize akutuma mikeji ha lwiji Nile mu mato. Yenu mikeji a tachi, hilukenu ku mahienu! Hilwisenu liji ku chifuchi chenu hakachi ka njiji, ku chifuchi chenu cha tachi, kuli atu jenu asuku asuku ni abema, waze akwa hashi heswe akwivwila woma.

³ Banjikenu, yenu akwa hashi heswe! Talenu ndoo munumona bendelo lia chilayi lia kumika helu lia milundu! Banjikenu hanga nwivwe kuhumuna cha chitavwi!

⁴ Mwene Zambi yangwamba ngwenyi: “Yami kwilu mungutala hashi hakepe hakepe ngwe chize mbundu yakunoka ha chivukuminya cha ufuku ha mwaka wa kuhela mbuto, ngwe mwa lwa uze unatemuka tangwa ha muchima.

⁵ Shimbu kanda achikungika mihuko ya vinyu, muze yitemo yeswe hiyaholoka, ni mbuto ya vinyu yeswe hiyabutuka kuhia, akwa kole maakonona Asudane. Muchibwa chashi lume ngwe chize atu akubatula mitango ya vinyu ni poko.

⁶ Mijimba ya tujita two maakayilia kuli tushitu ni tujila mu yambu. Ha lwiza tujila maakayilia, ha mwaka wa vula, tushitu maakayilia.”

⁷ Tangwa mulikeza lize Mwene Zambi Mukwa Ndundo Jeswe makatambula milambu ku chifuchi chino chakuhandununa ku njiji, chifuchi chino cha tachi, atu jamo asuku asuku ni abema, waze akuvwila woma kuli akwa hashi heswe. Kumaakeza ku mulundu wa Zione, kuze atu akuwayila Mwene Zambi Mukwa Ndundo Jeswe.