Izaya 17 - Mukanda Wa Zambi 1970

Zambi makamwesa Asiria ni Aisraele lamba

¹ Mwene Zambi kanambe ngwenyi: “Damasku kechi kubwa nawa limbo, mulibwa lume chingina cha yiswaswa.

² Membo ja mu Siria maabwa puya ndoo ku miaka yeswe.

³ Aisraele keechi kubwa nawa ni tachi ja kulifunga kuli akwa kole jo. Akwa limbo lia Damasku keechi kubwa nawa akwa kutusuka. Masalila ja Asiria maakevwa sonyi ngwe Aisraele. Yami Mwene Zambi Mukwa Ndundo Jeswe nachamba.

⁴ “Tangwa mulikeza lize ulemu wa Aisraele muukahwa, ni ubite wenyi muwalumuka uswale.

⁵ Israele makabwa ngwe munda uze haamakuna chivwale. Maakabwa amokomoko ngwe munda wa mu chikulo cha Refaime muze haauhela mbuto yawo yeswe.

⁶ Shina atu akepe lume maasala ni mwono. Israele mabwa lume ngwe mutondo wa olive uze haahela mihuko yeswe shina yaali hanji yitatu yasala ha masongo ja mitango ya kwilu, hanji yimwe ha mitango ya mwishi. Yami Mwene Zambi ya Israele nachamba.”

⁷ Ha tangwa lize atu maakatewulukila kuli Tangi yo, Zambi Munangi wa Aisraele.

⁸ Keechi kushachila nawa ha yilumbilo yo yize alingile, hanji ha utotombo wo: mahamba ja zambi wa pwo Ashera ni yilumbilo ya kwochela yuma ya vumba libema.

⁹ Ha tangwa lize membo waze te akwete yipanga yakukoleka, maakaabuzwola, maakasala ahululu ngwe membo ja Ahive ni ja Aamore muze achinyine Aisraele.

¹⁰ Aisraele, hinwavulama Zambi yoze wakunulamwina, yoze wakunufunga ngwe luliwe. Alioze nwakutunga yipanga ya chijila hanga nuwayile zambi ya tundaka.

¹¹ Alioze chibwe yitatuke, yibwe ni yitemo ha tangwa lize nwayitumbile, hindu kuyichi kema mihuko. Maakabwa lume ni musongo ni lamba.

Zambi yakumba akwa kole ja Aisraele

¹² Mavungu a tachi kaanavundula ni lundunjila ngwe kalunga lwiji, ngwe zungo lia miavu ya meya.

¹³ Mavungu maakalundumuka ngwe miavu ya tachi ya meya, alioze Zambi kanaakanjisa. No kaanahiluka ngwe fufuta yize yinahehuka ha milundu, ngwe chimwe chambu mu fuji.

¹⁴ Ha chingoloshi kaaneevwisa mwongo, alioze ha chichamene keeshiko. Chenacho muchikabwa songo lia waze akububa chifuchi chetu.