Izaya 16 - Mukanda Wa Zambi 1970

Lamba lia Amoabe

¹ Ku limbo lia Sela mu puya, Amoabe yaatuma mwana panga kuli mukwa kuyula mu Yerusaleme.

² Kaanashimbwila ku mbumbulu ya lwiji Arnone kaanatelumioka ngwe tujila waze haahuma ha yaswa yo.

³ Kaanambila Ayuda ngwo: “Tulwezenu chize chatamba kulinga. Tufungenu mu chihuhumuke chenu tangwa ha muchima. Tuli njize, tuswekenu kama muma muze niumwe kahashile kutumona.

⁴ Twechenu tutwame kama mu chifuchi chenu. Tuswekenu kama kuli waze anambe kutushiha.” (Kubinjisa ni kushiha muyikahwa, ni akwa kubinjisa chifuchi maakaya.

⁵ Mba umwe wa ku vungu lia David makabwa mwanangana; makayula atu ni umwenemwene ni zango. Makalinga nikawashi chize chinalite; makabatwila atu ni ululi.)

⁶ Ayuda yaamba ngwo: “Hitwevwa chize Amoabe akulengumuka. Tunanyingika ngwetu, kaakulisuta ni kulizelula, alioze kulisamba cho chili chamokomoko, cha mahuza.”

⁷ Amoabe kumaalila mumu ha lamba lio. Ayo eswe kumaalila muze meewuluka yakulia yibema yize te akulia mu limbo lia Kiri Herese, kumaalezumuka.

⁸ Minda yili hehi ni limbo lia Heshbone ni minda ya mitondo ya vinyu ya Sibma haayonona, vinyu yize akwa kuyula mavungu azengele nayo. Limwe tangwa mitondo ya vinyu yize yiitanda ni kuheta ku chivumbuko ndoo ku puya ni ku chitokelo mu sali lia chitende cha Kufwa.

⁹ Haliabwila ngunalilila vinyu ya Sibma ngwe chize ngunalilila Jazere. Ngunalilila Heshbone ni Eleale mumu kukushi mihuko ya kuwahilisa atu.

¹⁰ Niumwe Unevu chiseke mu minda ya chinuno. Niumwe unakololoka hanji unembi miaso mu minda ya vinyu. Niumwe unakame vinyu, milolo ya chiseke hiyahola.

¹¹ Ngunatwila Amoabe mikuma, ngunalinyengena Kiri Herese.

¹² Amoabe kaakukanduka ha milundu ni kuya ku mazuwo jo a chijila ni kuwayila ndoo ni muze haahonga, hindu keechi kwaakwasa nichimwe.

¹³ Lie liji alio Mwene Zambi ambilile kuli Amoabe.

¹⁴ Haliabwila Mwene Zambi kanambe ngwenyi: “Ha kuhwa cha miaka yitatu ubite weswe wa Moabe kumuutoka. Chibwe kaali ni miata anji, hindu akepe maakasala ni mwono, waze maakasala maakabwa alelu.”