Izaya 15 - Mukanda Wa Zambi 1970

Zambi makonona Amoabe

¹ Jino jili sango ja Amoabe. Membo ja Are ni Kire hoonona ha ufuku umuwika lume; mu chifuchi cha Moabe himwahola kuluu.

² Atu ja Dibone kaanakanduka ha mulundu haze akuwayila, kaanalili. Amoabe kaanalilila membo ja Nebo ni Medeba; haatewula tuwewe ni wevu.

³ Atu mu majila kaanazala mianji; mu limbo ni ha mafulumba ja mazuwo atu kaanatetwoka ni kulila.

⁴ Akwa membo ja Heshbone ni Eleale kaanatete, kuteta cho kaanachivu kusuku ndoo ku limbo lia Jahaze. Chibwe tujita eswe kaanachikima; eswe haalekumuka.

⁵ Ngunalinyenge mumu hali Amoabe! Atu kaanachinyina ku membo ja Zoare, ni Eglate Shelishia. Kaanachinyina ku chihunda cha Luhite nikulila, amwe kaanachinyina ku limbo lia Horonaime nikulila mbimbi.

⁶ Mwana lwiji Nimrime homa chau, mwambu wa ku mbumbulu hiwoma, kukushi chambu cha wisu nichimwe.

⁷ Atu kaanachinyina mu chikulo cha Yiseso ni yikashi yo.

⁸ Ku njiza yeswe ya Moabe kulila cho kaanachivu, ndoo ni ku membo ja Eglaime ni Berelime.

⁹ Ku limbo lia Dibone lwiji hachila ni manyinga. Mukubwa nawa Chuma chikwo chibi kuhiana, masalila eswe a mu Moabe maakaashiha.