Izaya 14 - Mukanda Wa Zambi 1970

Aisraele yaahiluka ku chifuchi cho

¹ Mwene Zambi kumakevwila atu jenyi Aisraele keke ni kwatongola abwe atu jenyi mwene. Makaatayiza kutwama mu chifuchi cho ene, ni yilambala maakeza ni kutwama hamwe no.

² Mavungu anji maakakwasa Aisraele kuhiluka mu chifuchi chize aahele kuli Mwene Zambi. Kwenako mavungu maakalingila Aisraele ngwe ndungo. Mavungu waze akumbile Aisraele hatangu, Aisraele no maakaakumba ni kwayula.

Mwanangana wa Babilonia muma lia afu

³ Mwene Zambi makahwimisa Aisraele ku lamba lio ni ku yihungumiona yo, ni ku milimo yikalu yize aalingishile kuli akwa kole jo.

⁴ Muze makalinga chino, Aisraele chaatamba kulenya mwanangana wa Babilonia ngwo: “Ayenwe! Mwanangana chiswii haalimbuka chichize! Kechi kabinjisa nawa niumwe!

⁵ Mwene Zambi hasulisa tachi ja akwa kuyula abi,

⁶ waze abinjishile atu, ni kaalitwaminyine ko kuhungumiona mavungu waze akumbile.

⁷ Haliabwila akwa hashi eswe kaali mu uhwimino, kaanembi ni chiseke.

⁸ Mitondo Shipre ni sedru ya ku chifuchi cha Libano yinawahilila mumu mwanangana halimbuka; kukushi nawa niumwe yoze mayinunguna, mumu mwanangana keshiko!

⁹ “Muma lia afu munalulika kutambula mwanangana wa Babilonia. Afu waze te akwete tachi hano hashi kaanazumbwoka. Atu waze te abwile mianangana kaanakatwoka ha yitwamo yo.

¹⁰ Ayo eswe kaanamutambika ngwo: ‘Ni yena nawa hiwabwa mulelu ngwe yetu! Hiwabwa umwe wa kuli yetu!

¹¹ Hatangu atu te kaakukulemesa ni miaso ya tulialia, alioze haliabwila hiwabwa muno muma lia afu. Unabombo ha muhela wa mavuno, Wakulifuka ni hina lia misangwinya.’

¹² “Mutumbu wa chichamene, hiwalimbuka chichize kwilu! Hatangu yena wakumbile mavungu, alioze haliabwila ni yena haakunyasa hashi.

¹³ Yena wabatwile ngwe: ‘Munguzezuka mwilu ni kusa chitwamo chami helu lia matongonoshi.’ Yena wanyongene ngwe: ‘Mungubwa mwanangana ha mulundu wa ku norde kuze kunalikungulwila mazambi.’

¹⁴ Yiwamba ngwe, ‘Munguzezuka helu lia malelwa ngubwe ngwe Zambi Mukwa Ndundo Jeswe.’

¹⁵ Alioze haanakunyase muma lia afu, mwajotoka.

¹⁶ “Afu maakutala, maakuhulikila meso, maahula ngwo: ‘Yono hi yoze ko wanyikishine hashi ni kuchikimisa mawanangana, nyi?

¹⁷ Yono hi yoze ko wabuzwile membo ni kupwisa he hashi puya, nyi? Hi yoze ko wakwikile funge jenyi kanda ahiluka ku mahio, nyi?’

¹⁸ Mianangana eswe a hashi kaanabombo mu mafuka jo a uhenya,

¹⁹ alioze yena kuushi fuka, mujimba we haumbila ubole. Haufuka ni mijimba ya tujita waze haanafu ku jita, haaumbila hamwe no mu wina, ni kuyiliataliata.

²⁰ Keechi kukufunda ngwe mianangana akwo, mumu hiwenyeka chifuchi che, hiwashiha atu je. Niumwe wa kuli akwa jiko lie abi makasala ni mwono.

²¹ Ashihenu! Ana ja mwanangana yono a malunga kumaafwa mumu ha milonga ya tushakulu two. Niumwe wa kuli ayo makayula hashi, hanji kuzalisa ho ni membo.”

Zambi makonona Babilone

²² Mwene Zambi Mukwa Ndundo Jeswe kanambe ngwenyi: “Munguhamika ni limbo lia Babilone ni kulionona. Chichi kuhichika niumwe ni mwono, chibwe ana, hanji makulwana, yami Mwene Zambi nachamba.

²³ Mungwalumuna Babilone abwe malowa, yikungulu maakatwama ko. Mungukakomba Babilone ngwe chize akukomba yiswaswa ni kuyimbila. Yami Mwene Zambi Mukwa Ndundo Jeswe nachamba.”

Zambi makonona Aasuria

²⁴ Mwene Zambi Mukwa Ndundo Jeswe halishinga ngwenyi: “Chize nanyongene, munguchilinga. Chize nabatwile muchibwa.

²⁵ Mungukonona Aasuria mu chifuchi chami cha Israele ni kwaliataliata ha milundu yami. Mungujitula atu jami ku kanga ya Aasuria ni ku yilemu yize akumbata.

²⁶ Wano e manyonga jami mumu hali akwa hashi; hinazoza kwoko liami ni kumwesa mavungu lamba.”

²⁷ Mwene Zambi Mukwa Ndundo Jeswe habatula kulinga chino, hazoza kwoko lienyi amwese lamba; niumwe mamukanjisa.

Zambi makamwesa Afilistia lamba

²⁸ Maliji wano ambujolele ha mwaka uze afwile mwanangana Ahaze ngwo:

²⁹ Yenu Afilistia mbulo yize anulambile nayo hiwamakuka, alioze kanda nuwahilila, mumu muze lunoka umuwika mafwa, mukwo mubi Wahiana mamusalakana. Mu lionda lio Jimuwika mumutuhuka kashitu dragone yoze mahasa kuhumuka.

³⁰ Mwene Zambi mabwa kafunga ka yiswale mukachi ka atu jenyi hanga aahwimise. Alioze yenu Afilistia makanutumina zala yinji, niumwe kechi kasala ni mwono.

³¹ Lilenu, tetwokenu hanga anukwase, yenu membo eswe ja Afilistia! Yenu eswe, ivwenu woma! Lelwa linakatuka ku norde, lili tujita, mukachi ko kumushi akwa kukokoloka.

³² Kuchi mutukumbulula tunganda waze anakatuka kuli Afilistia? Mutwaakumbulula ngwetu, Mwene Zambi hatakamisa Zione, nawa ngwetu, atu jenyi, akwa lamba, maawana mo uhwimino.