Izaya 13 - Mukanda Wa Zambi 1970

Zambi makamwesa Babilone lamba

¹ Izaya mwana wa Amoze, mwe watambwile maliji wano kuli Zambi hakutwala ku limbo lia Babilone.

² Mikenu bendelo lia jita ha mulundu haze kuheshi yibuta. Kololoka kuli tujita, Olola kwoko ngwe chinyingi kuli ayo cha kwasa jita ni limbo lia akwa kulengumuka.

³ Mwene Zambi hatambika tujita twenyi a tachi ase jita ya chijila amwese lamba waze haatenukina.

⁴ Banjikenu chizungozungo ha milundu, liji linene linakalumioka mukachi ka atu, liji lia mavungu ni mawanangana waze analikungulula. Mwene Zambi wa tujita kanalulika tujita twenyi ase jita.

⁵ Ku yifuchi kusuku anakatuka, ku mbango jiwana ja hashi. Mwene Zambi, mu ufwatulo wenyi, kaneza ni kwonona chifuchi cheswe.

⁶ Lilenu mbimbi! Tangwa lia Mwene Zambi hiliakundama, tangwa lize Mwene Zambi Mukwa Ndundo Jeswe makeza ni kwonona.

⁷ Moko ja atu eswe maakazeya, eswe maakabwa ni mulekeleke.

⁸ Ayo eswe maakalishimwoka, eswe maakevwa misongo, ngwe pwo yoze unambe kusema. Maakalitalatala ni woma, maakevwa sonyi kuhiana.

⁹ Tangwa lia Mwene Zambi kulineza, tangwa lia uswii, ni lia ufwatulo, ni utenu. Hashi muhakabwa ngwe puya, ni yivulumunyi eswe maakonona.

¹⁰ Matongonoshi eswe a mwilu ni mbunga yo yeswe kuyichi katemuka nawa; tangwa mulikalaa muze linavumbuka, ni kakweji kechi katwa nawa mieji.

¹¹ Mwene Zambi kanambe ngwenyi: “Mungukonona he hashi ni kumwesa yingulungulu eswe lamba mumu ha milonga yo. Mungukakehesa akwa kulengumuka ni akwa kulizata ni yiswii eswe.

¹² Atu waze maakasala ni mwono maakabwa akepe ngwe oru yibema.

¹³ Mungukachikimisa lilu, ni hashi muhanyika ha tangwa lize yami Mwene Zambi Mukwa Ndundo Jeswe mungukasolola utenu wami.

¹⁴ “Yilambala eswe waze atwama mu Babilone maakachinyina ku yifuchi yo ene, nikumwangana ngwe chize kai akuchina mayanga, ngwe mapanga waze keeshi kafunga.

¹⁵ Mweswawo maatakana kuli akwa kole, maamushiha.

¹⁶ Akwa kole maakaashihashiha ana jo ku meso jo, maakabuzwola mazuwo jo, maakalimona ni mapwo jo ni tachi.”

¹⁷ Mwene Zambi kanambe ngwenyi: “Ngunavundula Amedia hanga ase jita ni Babilone. Ayo keeshi kuzanga prata; keeshi kuwahilila ni oru.

¹⁸ Ni mata jo akwasa ni mivwi yo kumaakashiha akweze. Keechi kevwila ana akemba keke, chibwe twanuke.

¹⁹ Chifuchi cha Babilonia chili ni uhenya kuhiana yifuchi yeswe yikwo; atu kaakulisuta. Alioze yami Mwene Zambi, mungukenyeka Babilone ngwe chize nalingila Sodome ni Gomora!

²⁰ Niumwe kechi katunga ko nawa. Mukwa Arabia chendenganyi niumwe makajika ko nawa zuwo lienyi lia makubu. Kafunga niumwe makalishila ko nawa yimuna yenyi.

²¹ Mukukabwa homa ha tushitu a mu puya. Yikungulu maakatunga ko yaswa yo, ni tujila otrishe maakabwa ko, ni pembe a mu yambu maakahehela ko,

²² ni mikuza ni yimbulu maakabwozela ko. Tangwa lia lamba lia Babilone hiliaheta! Matangwa jenyi keechi kabwa nawa anji.”