Izaya 12 - Mukanda Wa Zambi 1970

Mwaso: Sakwililenu Mwene Zambi

¹ Tangwa mulikeza lize atu maakemba ngwo: “Mwene Zambi, ngunakusakwilila! Yena wangutenukinyine, alioze haliabwila unangulembejeka, utenu we hiwahwa.

² Zambi kali chilamwina chami; mungushachila hali iye, chichi kwivwa woma. Mwene Zambi kakungutakamisa, kali mwono wami; kali chilamwina chami.

³ Munukataha meya ni chiseke mu mashima ja ulamwino.”

⁴ Tangwa mulikeza lize atu maakemba ngwo: “Sakwililenu Mwene Zambi! Mutambikenu anukwase! Ambulwilenu mavungu eswe yize hanalingi! Ambujolenu unene wenyi!

⁵ Mwimbilenu Mwene Zambi, halinga yuma yinene. Sango jino jikafumane hashi heswe.

⁶ Atu eswe mu Zione imbenu, wahililenu! Zambi Munangi wa Aisraele kali munene, katwama mukachi ka atu jenyi.”