Izaya 11 - Mukanda Wa Zambi 1970

Wanangana wa Uhwimino

¹ Vungu lia wanangana wa David lili ngwe mutondo uze haanunguna; alioze ngwe chize mitango yaha yakusokoloka ku chimbunji, Chenacho nawa mwanangana wa ku vungu lia David makasoloka.

² Mwiku wa Mwene Zambi muumwaha mana, ni yinyingi, ni malinjekela yakuyula nayo atu jenyi. Makanyingika chize Mwene Zambi anazange, makamulemesa.

³ Makawahilila ni kumwononokena. Kechi kabatula nikulita ni chize makamona hanji makevwa,

⁴ alioze makabatwila yiswale ni ululi; makahakwila akwa kuhona ni mbunge yibema. Makahana shimbi, mba atu akwo maamwesa lamba, ni atu abi maashiha.

⁵ Makayula atu jenyi ni ululi ni mbunge yibema.

⁶ Tungunga maakatwama hamwe ni mapanga mu uhwimino, kolwama maakautama hamwe ni misamba a pembe. Yimbembe a ngombe maakalia hamwe ni mievu a tambwe, ni ana akepe maakabwa tufunga two.

⁷ Ngombe ni ursu maakalia hamuwika, ana jo maakautama hamuwika ni uhwimino. Tambwe maakalia mwambu ngwe ngombe.

⁸ Chibwe mwana kemba kechi kubwa Chuma nyi mahehela hehi ni chihili.

⁹ Ha Zione, mulundu wa chijila wa Zambi, kuhechi kabwa Chuma chimwe cha yikola hanji chibi. Chifuchi cheswe muchikazala ni malinjekela a Mwene Zambi ngwe chize tulunga lwiji akuzala ni meya.

Funge maakahiluka ku chifuchi cho

¹⁰ Tangwa mulikeza lize mwanangana mwaha wa ku vungu lia wanangana wa David makabwa ngwe chilayi hakachi ka mavungu. Atu eswe maakalikungulula mu limbo lienyi lia wanangana ni kumulemesa.

¹¹ Muze lie tangwa mulikaheta, Mwene Zambi makalinga ni mana ni ndundo jenyi akahilwise atu jenyi waze asalile mu chifuchi cha Asuria, ni Egiptu, ni Patrose, ni Sudane, ni Elame, ni Babilonia, ni mu limbo lia Hamate, ni mu yifuchi ya ku mbumbulu ya tulunga lwiji ni ha mahongo.

¹² Mwene Zambi kumakamika bendelo hakachi ka mavungu akaalweze ngwenyi, kakukungulula ni kuhilwisa nawa Aisraele ni Ayuda waze haanamwangashana ku mbango jiwana ja hashi.

¹³ Wanangana wa Israele kuuchi kubwa nawa ni ukwa wa Ayuda, ni Ayuda keechi kabwa nawa akwa kole ja Aisraele.

¹⁴ Eswe aali maakalichinga ni kuhamika ni Afilistia ku chitokelo, ni kububa waze atwama ku chivumbuko. Kumaakakumba Aedome ni Amoabe, Aamone maakononokena

¹⁵ Mwene Zambi makomisa kalunga lwiji Sueze, ni kuneha fuji ya kahia yize muyikomisa lwiji Ufrateze. Mba makahichika lume yitwetwe shimbiali, hanga atu eswe maahasa kwenda hashi homu.

¹⁶ Mukukabwa chikoka chize muchikakatuka ku Asuria muze atu jenyi waze maakasala mu undungo akaye mo, ngwe chize chabwile muze tushakulu two atuhukile mu Egiptu.