Izaya 10 - Mukanda Wa Zambi 1970

¹ Lamba lienu! Yenu nwakusa Shimbi ja uhenge ni kubinjisa atu jami.

² Chenacho nwakukinda yiswale kanda abwa mu uhwimino ni kanda abatwila ni ululi. Ngwe chino nwakwanda yuma ya mbala ya mapwo waze haanafwisa malunga ni ana a shiwa.

³ Yika munulinga muze Mwene Zambi makanumwesa lamba? Yika munulinga muze makanukokela lamba lia ku chifuchi kusuku? Kuli iya munukachinyina anukwase? Kulihi munukasweka ubite wenu?

⁴ Makanushihila mu jita hanji kunupwisa funge. Chibwe chocho utenu wa Mwene Zambi kanda uchihwa; hindu kanazozo kwoko lienyi ni kwamwesa lamba.

Mwanangana wa Asuria kali mweto wa Zambi

⁵ Mwene Zambi kanambe ngwenyi: “Ngunakwata Asuria ngwe mbulo yakulamba nayo yoze ngunatenukina.

⁶ Ngunatumu Asuria alimike ni vungu lize liakulelesa Zambi, atu waze haananguvwisa utenu. Ngunaatumu ni kububa ni kwaliata ngwe fufuta mu majila.”

⁷ Alioze mwanangana wa Asuria kali ni manyonga jenyi mwene akumwesa atu lamba. Habatula ha kwonona mavungu anji.

⁸ Kanalisambe ngwenyi: “Miata a tujita twami eswe kaali mianangana!

⁹ Hingunakumbu membo ja Kalno ni Karkemishe, ni Hamate ni Arpade, ni membo ja Samaria ni Damasku.

¹⁰ Hinolola kwoko liami ni kumwesa lamba akwa mawanangana waze akukombelela mahamba, mahamba anji kuhiana waze a mu Samaria ni Yerusaleme.

¹¹ Hinonona Asamaria ni mahamba jo; mungulinga nawa chizechene ku Yerusaleme ni mahamba waze akukombelela ko.”

¹² Mwene kanambe ngwenyi: “Muze mungumanununa chize mungulinga ha mulundu wa Zione ni mu Yerusaleme, mba mungumwesa lamba mwanangana wa Asuria mumu ha kulengumuka ni kulisamba chenyi cheswe.”

¹³ Mwanangana wa Asuria kanalisambe ngwenyi: “Yino yeswe yami mwene nayilinga. Nguli mukwa tachi ni mana ni yinyingi. Hinachiza njiza mukachi ka mavungu; hinachiza ubite mu mishete yo. Hinaliataliata mavungu waze ngwe kuji a ngombe.

¹⁴ Mavungu kaali ngwe chaswa cha tujila, hinatambula ubite wo ngwe chize atu akuchinga monda. Niumwe kazundwile pulwa lienyi hanji kubakula kanwa lienyi ni kunguhanga!”

¹⁵ Alioze Mwene Zambi kanambe ngwenyi: “Kuma njimbu yinahiana mutu yoze unalingi nayo, nyi? Poko ya kubula nayo mitondo yinahiana mutu yoze unayikwata, nyi? Mbulo kuyahashile kuzundula mutu yoze unayikwata; mutu mwe wakuzundula mbulo.”

¹⁶ Mwene Zambi Mukwa Ndundo Jeswe makamwesa lamba ni musongo waze anatoho. Mba mijimba yo muyikasasaminya ngwe kahia.

¹⁷ Zambi, ndeya ya Aisraele, malumuka kahia. Zambi munangi wa Aisraele malumuka mulengi wa kahia uze muwocha yuma yeswe, chibwe mingonga ni mikalale ha tangwa limuwika.

¹⁸ Usaki ni ye minda ya chinuno maakayenyeka yeswe fwitaa, ngwe chize musongo wa kufwa wakushiha mutu.

¹⁹ Mitondo yikepe muyisala, chibwe mwana mahasa kuyalula.

Aisraele akepe maakahiluka ku chifuchi cho

²⁰ Matangwa maakeza waze masalila ja Aisraele keechi kashachila nawa hali mavungu waze ambile kwashiha. Alioze kumaakashachila hali Mwene Zambi, munangi wa Aisraele.

²¹ Masalila ja Aisraele maakahiluka kuli Mwene Zambi yo Mukwa Ndundo.

²² Chibwe Aisraele oke naye haliabwila ngwe masekeseke a ku mbumbulu ya kalunga lwiji, hindu akepe maakahiluka. Maakashiha anji nikulita ni yitanga yo yibi.

²³ Mwene Zambi Mukwa Ndundo Jeswe makonona akwa chifuchi eswe ngwe chize ambile.

Mwene Zambi makamwesa Aasuria lamba

²⁴ Mwene Zambi Mukwa Ndundo Jeswe yambila atu jenyi waze atwama mu Zione ngwenyi: “Kanda nuvwila Aasuria woma, chibwe anuhungumione, ngwe chize alingile akwa Egiptu.

²⁵ Mungwecha kunumwesa lamba ha shimbu likepe, mba mungwanongesa.

²⁶ Yami, Mwene Zambi Mukwa Ndundo Jeswe, mungwalamba ni shikote (fimbo) ngwe chize nalambile Amidiane ku liwe lia Orebe. Aasuria mungwamwesa lamba ngwe chize nalingile Aegiptu.

²⁷ Ha matangwa waze, mungukanulamwina ku moko ja Aasuria, kanga yo kuyichi kabwa nawa hali yenu.”

Aasuria yaasa jita ni Aisraele

²⁸ Tujita twa akwa kole haakumba limbo lia Ayi, haabalika chifuchi cha Migrone, yaahichika yikashi yo ya jita ku limbo lia Mikmashi.

²⁹ Yaazomboka jila ya mukachi ka milundu, ufuku uno kaanabombo ku limbo lia Geba! Akwa Rama kaanachikima, atu a ku limbo lia mwanangana Saulu, ku Gibea haachina.

³⁰ Akwa Galimi kololokenu! Yenu akwa Laisha, banjikenu! Yenu akwa Anatote, kumbululenu!

³¹ Akwa Madmena ni akwa Gebime kaanachinyi alilamwine.

³² Tangwa lia musono akwa kole kaali ku limbo lia Nobe. Kwenako anahalila mulundu wa Zione ku limbo lia Yerusaleme.

³³ Mwene Zambi Mukwa Ndundo Jeswe maaholola hashi ngwe chize akuholola mitango ya mutondo. Atu alemu ni akwa kulengumuka kumaakabatwola ni kwahombola.

³⁴ Mwene Zambi kumaakabatwola ngwe chize akubatwola mitondo ya mu usaki ni ngimbu, ngwe chize akusalwila hashi chibwe mitondo yibema ya ku Libano!