Izaya 1 - Mukanda Wa Zambi 1970

¹ Mukanda uno unalumbununa maliji hakutwala ku chifuchi cha Yuda ni limbo lia Yerusaleme, waze Zambi asolwele kuli Izaya mwana wa Amoze ha matangwa ja kuyula cha Uzia, ni Jotame, ni Ahaze, ni Hezekia mianangana ja Yuda.

Zambi yatoweza atu jenyi

² Mwene Zambi yamba ngwenyi: “Hashi ni lilu, banjikenu yize ngumambe! Ana waze nalelele ni kwahoka haangukatukila.

³ Ngombe kaakunyingika kako, ni yimbulu kaakunyingika ulilo wa maha kako, alioze atu jami Aisraele keeshi kunyingika nichimwe.”

⁴ Lamba lienu vungu lia yivulumunyi, yihenge kanda yingulungulu! Hinunehuka Mwene Zambi, Zambi munangi wa Aisraele, hinunamumbu nyima.

⁵ Mumu yika nwakungukatukila? Nunazange anumwese lamba liahiana, nyi? Israele mutwe we weswe unayiji, mbunge yeswe yinalekumuka.

⁶ Mujimba weswe hiwabiha chize ku mutwe ndoo ku molu. Hiwazala ni mijiji ni yilonda, yize kanda achiyiwuka ni kuyikasa, chibwe kuyilemba amwe maji.

⁷ Chifuchi chenu hichabwa chahululu, membo jenu hoocha kahia. Yilambala haanatambula chifuchi chenu ni kwonona yuma yeswe, ni yenwene nunachimono.

⁸ Shina Yerusaleme wika mwe wasala; keshi tachi ja kukumba tujita twa akwa kole, ngwe mukanda mu munda wa vinyu, hanji ngwe chikulika mu munda wa chingombwa.

⁹ Nyi ngwe Mwene Zambi Mukwa Ndundo Jeswe katuhichikilile ko amwe masalila, kachi te Yerusleme habwa ngwe membo ja Sodome ni Gomora.

¹⁰ Yerusaleme, akwa lutwe je ni atu je kaali ngwe Sodome ni Gomora. Banjikenu yize Mwene Zambi ananwambe. Kanyamenu ku yize Zambi yenu ananulongesa.

¹¹ Kanambe ngwenyi: “Nunanyongo ngwenu, yami ngunazange milambu yenu yeswe yize nwakulambula, nyi? Hijanguhwa ni milambu yenu ya makuji a panga a kwocha ni maji a yimuna yikwo ya kutunguna. Hijanguhwa ni manyinga a makuji a ngombe ni pembe.

¹² Iya wanwambile kungunehena yize yeswe muze nuneza ni kunguwayila? Iya wanwambile kuliataliata mu yiize ya zuwo liami?

¹³ Kanda nungunehena nawa milambu yamokomoko. Milambu yenu ya vumba libema kuyakunguvwisa kuzelwoka. Chishi kutayiza yiwanyino yenu ya Kakweji Mwaha, ni matangwa jenu a kuhwima, ni kulikungulula chenu chikwo. Yize yeswe nwakuyihengesa mumu ha shili yenu.

¹⁴ Nakubihilila ni yiwanyino yenu ya Kakweji Mwaha ni matangwa jenu a chijila, yeswe yize hiyinangubikalisa, hinahonga nayo.

¹⁵ “Muze munwolola moko jenu ha kungulemba, chichi kunutala liso. Chibwe nulembe lembieee, chichi kubanjika, mumu moko jenu haachila ni manyinga ja atu.

¹⁶ Sanenu nulibemese. Litwaminenu yibi yeswe yize nwakulinga. Ewa, litwaminenu kulinga yibi,

¹⁷ lilongesenu kulinga yibema, batulenu ni ululi, kwasenu atu waze akuhungumiona; fungenu ana a shiwa, hakwilenu mapwo waze haanafwisa malunga.”

¹⁸ Mwene Zambi kanambe ngwenyi: “Tweyenu haliabwila tulivwe, chibwe milonga yenu yachila naye ngee, kumuyibwa yitoma ngwe chiwe. Chibwe yibeka yenu ya mu mbunge yahiana naye kuchila, kumuyibwa yitoma ngwe Wanda.

¹⁹ Nyi ngwe munungwononokena lume, kachi munukalia mbuto yibema ya mu chifuchi chenu.

²⁰ Alioze nyi nwangulituna, kumunukafwa mu jita. Yami Mwene Zambi nachamba.”

Limbo lia milonga

²¹ Limbo lize liabwile lia kushishika, hilialumuka lia utanji! Hatangu liazalile ni akwa ululi, alioze haliabwila himwasala lume akwa kushiha atu.

²² Yerusaleme, yena wabwile ngwe prata, alioze haliabwila uli wamokomoko; wabwile ngwe vinyu yibema, alioze haliabwila uli lume ngwe meya.

²³ Miata jenu kaali yihulia ni masepa jo eji; matangwa eswe kaakutambula yawana ni mbongo ja mbenga. Ku chisopelo keeshi kuhakwila ana a shiwa, chibwe kubanjika kuli mapwo waze haanafwisa malunga.

²⁴ Kashika haliabwila banjikenu chize anambe Mwene Zambi Mukwa Ndundo Jeswe, Zambi ya Ndundo ya Israele. Ngwenyi: “Mungumwesa yenu akwa kole jami lamba, kunuchi kunguchikilika nawa.

²⁵ Mungunumwesa lamba, mungunubemesa ngwe chize atu akusayisa utale; munguchiza uhenge wenu weswe.

²⁶ Mungukanwaha miata ni akwa kuyula ngwe waze nwabwile no ku shakulu. Mba Yerusaleme maakamuvuluka ngwo: ‘Limbo lia ululi kanda lia kushishika.’ ”

²⁷ Mwene Zambi makalamwina Yerusaleme ni eswe waze maalumuka ku mbunge, mumu kali mukwa ululi.

²⁸ Alioze makonona yivulumunyi ni akwa uhulia eswe, makanongesa eswe waze akumwehuka.

²⁹ Munukevwa sonyi mumu nwawayilile mitondo ni nwalimine minda ya chijila.

³⁰ Munukalifwa ngwe mutondo shene uze himuuma, ngwe munda uze kuushi meya.

³¹ Ngwe chize kahia kakwocha yiswaswa, Chenacho nawa yitanga yibi ya yitakame muyikocha e yitakame. Niumwe mahasa kujima kahia kaze.