Hosea 9 - Mukanda Wa Zambi 1970

Mukwa munanyi Hosea yalweza Aisraele chize Zambi makaamwesa lamba

¹ Yenu Aisraele, litwaminenu tuhu kuwahilila ku yiwanyino yenu ngwe akwa mavungu akwo. Hinwehuka Zambi yenu, hinwamuvulumuna. Mu chifuchi cheswe nwalilanjishile ngwe yitanji kuli zambi Bale, yinuzanga mbuto, ye fweto ya utanji wenu.

² Alioze ha shimbu likepe kunuchi kabwa nawa ni mbuto yinalite, ni maji a olive, ni vinyu.

³ Aisraele keechi kanyongonona mu chifuchi cha Mwene Zambi, alioze maakahiluka ku chifuchi cha Egiptu, maakalia yakulia ya luchisa mu chifuchi cha Asuria.

⁴ Mu yifuchi yize ya yilambala keechi kalambwila mo nawa milambu ya vinyu ni yitapo kuli Mwene Zambi yo. Atu maakalichisa ni yakulia yo ngwe yize akulia waze haafwisa. Muyaakwasa lume ha kuhwisa zala yo; alioze keechi kuyitwala mu zuwo lia Zambi.

⁵ Muze tangwa lia yiwanyino mulikeza ha kulemesa Mwene Zambi, mba ayo kuchi maakalinga kama?

⁶ Muze lamba mulikeza atu maakamwangashana. Maakakunga kuli akwa Egiptu, maakunga hanga aafunde ku limbo lia Memfise! Ubite wo wa prata ni mazuwo jo muyikatanda ni mwambu ubi ni mingonga.

⁷ Tangwa lia kumwesa lamba hiliakundama, tangwa lize atu maakatambula nikulita ni yitanga yo. Muze yuma yino muyikabwa, Aisraele maakachinyingika! Mba munukamba ngwenu: “Mukwa munanyi yono kali chihepuke! Keshi ni Mwiku wa Zambi! Kanazaluka!” Nwakunguvutwokela mumu milonga yenu yili yinji.

⁸ Zambi hanangutumu ngwe mukwa munanyi ngutoweze atu jenyi Aisraele. Alioze kweswe kuze nakuyaya, nwakweseka kungwoza mu muheto ngwe kajila. Mu chifuchi cha Zambi atu kaali akwa kole ja mukwa munanyi.

⁹ Kujakangana! Kaali abi kuhiana, ngwe chize abwile ku limbo lia Gibea. Eeche! Zambi kumewuluka uhenge wo ni kwamwesa lamba.

Mulonga wa Aisraele ni chize Zambi makaamwesa lamba

¹⁰ Mwene Zambi kanambe ngwenyi: “Hatangu muze namwene Aisraele, kaabwile ngwe yichakata ya vinyu mu puya. Muze namwene tushakulu twenu chisuho chitangu, chabwile ngwe ngunamono mihuko yitangu ya mikuyu. Alioze, muze haaheta ku mulundu wa Peore, yaabutuka kwo kukombelela hamba Bale, yaalumuka akwa luchisa ngwe mahamba waze te akuzanga.

¹¹ Ulemu wa Aisraele muukakatuka ngwe chize akuhumuka kajila. Aisraele keechi kasema nawa ana, chibwe mapwo keechi kwaka nawa ufumba.

¹² Chibwe maakusema ana, mungukaachiza, chibwe umuwika kechi kasala. Muze hinehuka vungu lino, anyingike ngwo, lamba linji mulikawana.”

¹³ Mwene Zambi, hinamona ngwe chize akwa kole haajikinyina ana ja Aisraele ni kwazomba ni kwashiha.

¹⁴ Yika mungukuhula kama ha kwaalinga? Ngwami mapwo jo apwise kama miumba! Mele alikakaminye!

¹⁵ Mwene Zambi kanambe ngwenyi: “Ungulungulu weswe wa Aisraele wabutukile ku limbo lia Gilgale. Kwenako yami nabutukilile kwavutwokela. Mba ha ungulungulu uze haalinga, kumungukaahuma mu chifuchi chami ngwe chize lunga akuhuma pwo mu zuwo. Hi chichi kaazanga nawa, akwa lutwe jo haalimika ni yami.

¹⁶ Aisraele kaali ngwe mutondo uze hiwoma chau ku miji, kuushi kwima mihuko. Keechi kasema nawa ana, alioze chibwe maasema mungukashiha ana jo a zango.”

Mukwa munanyi yahanjika hakutwala kuli Aisraele

¹⁷ Zambi yoze nakulingila kumakehuka atu jenyi, mumu keeshi kumwivwa. Kumaakabwa yendanganyi mukachi ka mavungu.