Hosea 8 - Mukanda Wa Zambi 1970

Zambi yahisa Aisraele mumu akukombelela mahamba

¹ Mwene Zambi ngwenyi: “Humunenu chitavwi! Akwa kole kaanahulumuka ha chifuchi chami ngwe tela! Atu jami haashiha Usendo uze nakolesele no, haanakolema Shimbi jami.

² Chibwe kaakunguvulwoka ngwo: ‘Zambi yetu,’ chibwe kaakwamba ngwo: ‘Tuli atu jenyi. Tunamunyingika.’

³ Alioze haalituna yuma yibema. Kashika akwa kole jo kumaakaahanga.

⁴ “Atu jami yaatongola mianangana, kanguhulile ko. Yaapwisa akwa lutwe, alioze yami chaatayijile ko. Yaalinga mahamba a prata ni oru, yaalikokela kwonona.

⁵ Hingunavutwokela kuji a ngombe wa oru yoze akuwayila akwa limbo lia Samaria. Nguneevwila ufwatulo unji. Ndoo tangwa lika maakecha kuwayila mahamba jo?

⁶ Umwe Kaisraele mukwa utotombo yafula hamba yoze. Hamba yoze hi zambi ko! Kuji a ngombe wa oru yoze akuwayila mu limbo lia Samaria maakamubalwola!

⁷ Muze atu akukuwa fuji, kaakuhela ko chijimbi! Mu minda yize kuyishi kwima, kuyishi kuhana wunga. Alioze chibwe muyima, yilambala maayilia mo yeswe upu.

⁸ Akwa mavungu akwo kaamina Aisraele, Aisraele kaali mukachi ko ngwe Chuma chamokomoko.

⁹ Kaali akwa pami ngwe yimbulu a mu yambu. Haanayi mu jila yo ene. Haanayi kuli Asuria ni kwakamba aakwase. Aisraele haalilanjisa kuli atu akwo ngwe chize akulinga pwo chitanji.

¹⁰ Alioze mungwakungulula hamuwika ni kwamwesa lamba. Kumaakamona lamba muze mwanangana wa Asuria makaahungumiona.

¹¹ “Aisraele hookesa yilumbilo yakulambula milambu ya kuchiza milonga yo. Alioze yilumbilo yize yiyalumuka homa ha kuvulumionena.

¹² Nasonekene Shimbi jami jinji, alioze yaalituna jo ngwe yuma ya yilambala.

¹³ Kaakungulambula milambu ni kulia yifwo. Alioze yami Mwene Zambi Chishi kuwahilila nayo. Kashika mungukewuluka milonga yo ni kwamwesa lamba. Muhaahwa! Mungukaahilwisa nawa ku chifuchi cha Egiptu!

¹⁴ “Aisraele haatunga mazuwo anene abema, Ayuda no haatunga membo akukoleka. Alioze haavulama kwo Tangi yo. Mungukocha mazuwo jo ni membo jo.”