Hosea 7 - Mukanda Wa Zambi 1970

¹ “Muze nakuzanga kuwuka atu jami Aisraele ni kwawahisa nawa, hindu nakumona lume ungulungulu wo ni yibi yize akulinga. Kaakuhanjeka mahuza mukachi ko, kaakulokola mazuwo ni kwiya, kaakwiya yuma ya atu mu majila.

² Keeshi kunyonga ngwo, yami mungwiwuluka yibi yino yeswe. Alioze milonga yo hiyoka, kaahashile kuyisweka ku meso jami.”

Aisraele yaatwama akwa lutwe jo punga

³ Mwene Zambi kanambe ngwenyi: “Atu kaakwonga mwanangana ni akwa lutwe jenyi mu punga jo.

⁴ Eswe kaali yihulia. Usolo wo ubi uli ngwe jiko lia kahia lize akwochela mbolo, lize mwe mukwa kwocha mbolo kahashile kulisosela nawa ndoo ni muze mwaha hiwafutunuka.

⁵ Ha tangwa lia chiwanyino cha mwanangana, atu kaakuzengewesa mwanangana ni akwa lutwe jenyi ni vinyu aapwise yihepuke.

⁶ Mbunge jo jili ngwe kahia ka mu lutengo, mumu ha manyonga jo abi. Ufuku weswe utenu wo wakubwa ngwe mwishi alioze ha chichamene wakulengenya ngwe milengi ya kahia.

⁷ “Mu ufwatulo wo haashiha akwa kuyula jo. Mianangana jo haashiha umuwika umuwika, alioze niumwe keshi kunguhula kama ngwakwase.”

Aisraele ni akwa mavungu akwo

⁸ Mwene Zambi ngwenyi: “Aisraele kaali ngwe mwaha wa mbolo ha jiko uze kaalumwine, mumu haalinunga kulu ni mavungu waze anaajingilika.

⁹ Kaanyingikine ngwo, kulikata ni yilambala chinalekumuna tachi jo. Kaanyingikine ngwo, kambu jo hijatoma.

¹⁰ Aisraele kulengumuka cho chakwahisa. Haamona lamba lieka ni lieka, chibwe chocho kaasolo kuhiluka kuli yami Mwene Zambi yo.

¹¹ Aisraele kaali ngwe liembe yoze keshi mana, aku maatambika akwa Egiptu aakwase, aku maaya kuli Asuria!

¹² Alioze mungukaatela Wanda ni kwakwata muze anayi. Mungukaamwesa lamba ha yibi yize haalinga.

¹³ “Lamba lio! Haangwehuka, haangulituna. Kumaakafwa. Nazangile kwalamwina, alioze uwayilo wo uli wa ulembekese.

¹⁴ Keeshi kungulemba ni mbunge yimuwika, alioze kaakulila mbimbi ha mihela yo ngwe mavungu akwo. Muze akulemba mumu ha mbuto ni vinyu, maalilemeka ngwe mavungu akwo. Kaali lume yihulia!

¹⁵ Chibwe yami naalelele ni naatakamishine, hindu kaakungutwama punga.

¹⁶ Kaakungwehuka ni kuwayila zambi yoze keshi tachi. Kaali ngwe uta wa kwasa uze kaalemene lukusa ni tachi, mumu akwa lutwe jo kaakuhanjika ni kulengumuka, alioze kumaakafwa cha ponde, akwa Egiptu kumaakaaseha.”