Hosea 6 - Mukanda Wa Zambi 1970

Kwalumuka ku mbunge cha ulembekese

¹ Aisraele kaanambe ngwo: “Tuhilukenu kuli Mwene Zambi! Hatulamba, alioze kumatuwuka; hatulemeka yilonda, alioze kumayikasa. Hi chocho ko, nyi?

² Kuhwa cha matangwa aali hanji atatu matuhuzulula, mba tuliendele nenyi.

³ Twesekenu kunyingika Mwene Zambi. Ngwe chize tangwa liakuvumbuka, Chenacho nawa Zambi mahiluka mukachi ketu. Kumeza kuli yetu ngwe chize vula akutuchikisa hashi, vula musazu ni vula wa chehu.”

⁴ Alioze Mwene Zambi kanambe ngwenyi: “Ayenu Aisraele ni Ayuda, ngunulinge kuchi? Nunanguzange lume shimbu likepe, ngwe mbundu ya chichamene yize yinajimuka nikawashi, ngwe mume uze wakulukumuka muze tangwa hiliavumbuka.

⁵ Kashika hingunanutumina akwa munanyi ni maliji jami a ubatwilo ni a kwonona. Chize ngunazange Chinasoloka mwazu ngwe pangu.

⁶ Chize ngunazange kuhiana ngwami, nguzangenu ni mbunge yeswe, Chazangile milambu yenu ya yimuna. Chibema atu jami kungunyingika, hi chibema ko kungwochela milambu wika.

⁷ “Muze anjilile mu chifuchi chize naalakenyene, yaashiha Usendo uze nakolesele no ngwe chize alingile Samutu.

⁸ Limbo lia Gileade linazala ni ungulungulu ni yingalwe.

⁹ Mahako haalumuka mbunga ya eji waze akutwaminyina atu. Chibwe mu jila ya kuya ku Shekeme, kuma kwa chijila, kaakushihila ko atu, kaakulikunjika lume alinge yibi.

¹⁰ Hinamona Chuma cha kuzelwokesa mu Israele. Ayenwe, atu jami haalichisa ene, akombelele mahamba.

¹¹ “Ni yenu Ayuda, hinatongola tangwa lize mungukanumwesa lamba mumu ha yize yenu nwakulinga.