Hosea 5 - Mukanda Wa Zambi 1970

¹ “Yenu mahako ja Zambi, banjikenu! Yenu Aisraele, ivwenu! Yenu akwa jiko lia wanangana, halakanenu! Yenu chatamba kubatula ni ululi, alioze eswe nuli ni uhiso! Hinwabwa muheto ku limbo lia Mizpa, ni Wanda wakuta ha mulundu wa Tabore,

² ni wina usuku ku limbo lia Akasia; yenu eswe mungukanumwesa lamba.

³ Ngunanyingika chize abwa Aisraele, kaahashile kuswama ku meso jami. Haanalingi utanji, kaalitele ni kunguwayila.”

Hosea yakanyamisa atu ja Zambi

⁴ Ungulungulu uze atu haanalingi unaakinji ha kuhiluka kuli Zambi yo. Mahamba kaakwayula, atu kaasolo kutayiza Mwene Zambi.

⁵ Kulengumuka cha Aisraele chakwahisa ayo ene. Milonga yo yinaatalingisa ni kwali mbwisa, ni Ayuda kaakulimbuka hamwe no.

⁶ Kaakwanda mapanga jo ni ngombe jo hanga alambule mulambu kuli Mwene Zambi, alioze kuyichi kwakwasa. Keechi kumuwana, mumu hakatuka kulu kuli ayo.

⁷ Haanavulumuna Mwene Zambi, haanaseme ana a utanji. Kashika akwa kole jo maakoonona ha kakweji umuwika, hamwe ni minda yo.

Jita mukachi ka Ayuda ni Aisraele

⁸ Humunenu yitavwi ya jita mu limbo lia Gibea! Imbenu ha kukanyamisa akwa Rama! Twenu milolo ya jita ku Betele! Malunga ja Benjamine tuyenu mu jita.

⁹ Tangwa lia kumwesa Aisraele lamba kulineza, maakoonona lume. Aisraele, lamba lino kumulikabwa chamwenemwene!

¹⁰ Mwene Zambi kanambe ngwenyi: “Ngunevwila akwa lutwe ja Ayuda ufwatulo mumu haatutulula njiza ya Israele. Kashika mungukaamwesa lamba ngwe sanga lia meya.

¹¹ Aisraele kaanamono lamba, haatokesa Chipinji cha chifuchi cho mumu hasa mbunge ha yuma yamokomoko.

¹² Mungukenyeka Aisraele ngwe chize ndulu akwenyeka mahina. Mungukonona Ayuda ngwe chize tufulafula akwonona mitondo.

¹³ “Muze Israele hamona musongo wenyi, ni Yuda hamona yilonda yenyi, Israele yaya kuli mwanangana wa Asuria hanga aakwase, alioze iye kahashile ko kwahindwisa chibwe kuwuka yilonda yo.

¹⁴ Mungukalimika ni Aisraele ngwe tambwe. Mungukalitachika ni Ayuda ngwe mwevu wa tambwe. Mungukaapapujola yipinji yipinji ni kwahichika. Muze mungukaafwita, niumwe makahasa kwalamwina.

¹⁵ “Mungukehuka atu jami ndoo ni muze maakatayiza yibi yo, mba maakahiluka ni kungufupa. Mu lamba lio maakangufupa ni mbunge yeswe.”