Hosea 4 - Mukanda Wa Zambi 1970

Mwene Zambi yasuma Aisraele mulonga

¹ Mwene Zambi kanasumu atu a mu chifuchi mulonga. Yenu Aisraele, banjikenu, yize anambe Mwene Zambi ngwenyi: “Mu chifuchi kumushi ululi ni zango; atu kaanyingikine Zambi.

² Mumu kaakulakenya alioze keeshi kulinga; kaakuhanjika mahuza, kaakushiha, kaakwiya, kaakulinga utanji, kaakulikokela yitela ni kumwanga manyinga.

³ Kashika chifuchi muchikoma chau, ni waze eswe atwama mo kumaakafwa. Tushitu eswe a mu yambu, ni tujila, ni yishi kumaakafwa.”

Mwene Zambi yasuma mahako jenyi mulonga

⁴ Mwene Zambi kanambe ngwenyi: “Niumwe kanda asuma atu mulonga ni kwabinjisa, mumu ngunasumu yenu mahako mulonga.

⁵ Ufuku ni mwalwa nwakutalinga, ni akwa munanyi nawa keeshi kulinga yibema. Kashika mungukonona mwe noko Israele.

⁶ Atu jami kaakufwa mumu kaangunyingikine ko. Yenu mahako hinwalituna kungunyingika, hinwehuka longeso liami. Kashika ni yami hinanwehuka, chichi katayiza ana jenu a malunga kubwa mahako jami.

⁷ “Yenu mahako, chize nunayi ni kwoka, Chenacho nawa nwakuwezela kuvulumiona. Kashika mungukalumuna ulemu wenu kubwa sonyi.

⁸ Nunalibichisa ku kuvulumiona cha atu jami, kashika nwakuzanga avulumione lume.

⁹ Munukamona lamba lizeliene maakamona atu akwo! Mungukanumwesa lamba, mungukanufweta nikulita ni ungulungulu wenu.

¹⁰ Munukalia chitundo chenu cha milambu, hindu munukevwa zala. Munukakombelela hamba njinga, hindu kunuchi kabwa ni ana, mumu hinunangwehuka ha kukaula mazambi eka.”

Mwene Zambi yahisa akwa kukombelela mahamba

¹¹ Mwene Zambi ngwenyi: “Vinyu yikulu chibwe yaha, yakubinjisa manyonga ja atu jami!

¹² Kaakwita mana ku Chipinji cha mutondo! We mutondo Wakwalweza yize maazanga kunyingika! Haanangwehuka. Ngwe umwe pwo yoze halipwisa chitanji, haalikunjika kuli mazambi eka.

¹³ Malunga kaakulambula milambu ku miyombo ha milundu, ni kwochela yuma ya vumba libema ha mindundena mushi lia mitondo yisuku, mumu yihuhumuke yayo yibema! “Kashika ana jenu a mapwo haanalumuka yitanji, ni atembwa anenu a mapwo no akulinga utanji.

¹⁴ Chibwe chocho chichi kwamwesa lamba, mumu ni yenwene mahako ja Zambi nwakuya ku mazuwo ja mazambi eka ni kulinga utanji ni yitanji waze atwama ko, nwakulambula milambu hamwe no. Ngwe chize chishima chinambe ngwo: ‘Atu waze keeshi mana maakoonona.’

¹⁵ “Chibwe yenu Aisraele nwakulinga utanji, alioze yenu Ayuda kanda nulinga ngwe ayo. Kanda nuwayila mu membo ja Gilgale ni Betele, chibwe kulishingila ko mu jina lia Mwene Zambi ya mwono.

¹⁶ Aisraele kaali ni pami ngwe yimbembe a ngombe. Ngwe kuchi munguhasa kwalisa ngwe ana mapanga mu chihila chinene?

¹⁷ Aisraele haanalinungu ni mahamba. Echenu kwo.

¹⁸ Nyi haazengewa kaakuwahilila ni kulinga utanji, kaakuzanga kwo sonyi kuhiana ulemu.

¹⁹ Maakaatwala kusuku ngwe chize fuji yakuhehula yiswaswa. Maakevwa sonyi mumu akulambula milambu ku mahamba.