Hosea 3 - Mukanda Wa Zambi 1970

Hosea ni pwo chitanji

¹ Mwene Zambi yangwamba ngwenyi: “Tambula nawa pwo lie yoze hanalumbuka ni lunga weka. Chatamba kumuzanga kanawa ngwe chize yami nakuzanga Aisraele, chibwe haanatewulukila kuli mazambi eka ni kwalambula mihuko ya vinyu.”

² Kashika ha kumutambula nawa yingufweta yipinji ya prata kumi ni yitano, ni kilo ja masa 150.

³ Yingumulweza ngwami: “Matangwa anji maakabalika, yena chatamba kungushimbwila, kuuchi kalinga nawa utanji. Ni yami ha matangwa waze eswe mungukakushimbwila.”

⁴ Kulumbunuka ngwo, Aisraele matangwa anji maakabalika, maakahona mianangana ni akwa kuyula, chibwe milambu, hanji tumenga a mawe, chibwe mahamba, hanji ngombo.

⁵ Alioze tangwa kumulikeza lize Aisraele maakahiluka nawa kuli Mwene Zambi, Zambi yo, ni kuli umwe wa ku vungu lia David mwanangana wo. Mba maakalemesa Mwene Zambi ni kutambula yawana yenyi yibema.