Hosea 2 - Mukanda Wa Zambi 1970

¹ Kashika vulukenu usoko wenu Aisraele ngwenu: “Atu ja Zambi” ni “Zambi Kananuzange.”

Kupianguka cha Gomere. Kupianguka cha Aisraele

² Ana jami, lembejekenu noko, chibwe hi pwo liami ko nawa, ni yami hi nguli nawa lunga lienyi ko. Mulembejekenu alitwamine kulinga utanji.

³ Nyi kasolo, mungukamuzula mahina jenyi, makabwa uselesele ngwe tangwa lize asemukine. Mungukamuwangamisa, makoma ngwe chifuchi chumu, makafwa ni pwila.

^4-5 Ana jenyi chichi keevwila keke; mumu kaali ana ja chitanji yose keshi sonyi. Mumu yamba ngwenyi: “Munguya kuli masepa jami, mumu kaakungwaha yakulia ni yakunwa, ni mahina, ni maji a olive, ni vinyu.”

⁶ Mungujika jila yenyi ni mbimbo ni kutunga chipanga cha mawe mu jila yenyi.

⁷ Makaula masepa jenyi fuji, alioze kechi kaaheta. Makaafupa alioze kechi kaamona. Mba makalihanjikisa ngwenyi: “Nyi chize, ngunahiluka kuli lunga liami mutangu, mumu nabwile kanawa, hi ngwe chize ko nguli haliabwila.”

⁸ Katayijile ko ngwenyi, yami mwene namuhele mbuto, ni vinyu, ni maji a olive, ni prata, ni oru yeswe yize akuwayila nayo hamba Bale.

⁹ Kashika ha tangwa lia kubatula mbuto mungukatambula yawana yami ya mbuto, ni vinyu, ni mahina aze namuhele azale.

¹⁰ Mungukamuzula mahina nikumwecha uselesele ku meso ja masepa jenyi, hanga tutale yoze makamulamwina ku kwoko liami lia ndundo.

¹¹ Mungukasulisa yiwanyino yenyi yeka ni yeka, ya mwaka ha mwaka, ni ya kakweji ni kakweji, ni ya semana ni semana.

¹² Mungukenyeka mitondo yenyi ya vinyu ni ya mikuyu, yize akwamba ngwenyi: “Masepa jami e anguhele yo.” Minda yenyi mungukayipwisa puya, tushitu a mu yambu maakayenyeka.

¹³ Mungukamumwesa lamba mumu ha matangwa waze anguvulamine muze ochelele hamba Bale yitumbo ya vumba libema, ni muze azalile yingeliengelie yenyi, ni muze akawile masepa jenyi. Yami Mwene Zambi nachamba.

Zango lia Mwene Zambi kuli atu jenyi

¹⁴ Alioze mungukamutwala nawa mu puya, mungukamulembejeka ni maliji a zango.

¹⁵ Mungukamuhilwishila minda ya vinyu yize abwile nayo hatangu. Mungukalumuna chikulo chenyi cha lamba kubwa kumwe kuma kwakusa mbunge ni kuhiluka kuli yami Zambi. Mba makangutayiza ngwe chize alingile muze abwile mwana pwo, muze akatukile mu Egiptu.

¹⁶ Mba makanguvuluka nawa ngwenyi: “Lunga liami”, hi kechi kanguvuluka nawa ngwenyi: “Bale yami.”

¹⁷ Chichi kamutayiza nawa kuwayila jina lia Bale.

¹⁸ Ha tangwa lize mungukakolesa Usendo ni tushitu eswe a mu yambu ni tujila. Ha chino keechi kaalemeka nawa atu jami. Mungukachiza yitwa yeswe ya jita mu chifuchi. Mikwale, ni mata akwasa kuyichi kabwa ko nawa. Mba mungukatayiza atu jami kutwama kanawa mu chifuchi.

¹⁹ Israele, mungukakumbata; mungukabwa wanjika kanda mukwa kushishika. Mungukakulweza utu ni kukuvwila keke; mungukakupwisa niwami ndoo ku miaka yeswe.

²⁰ Mungukamanununa yilakenyo yami hanga ukabwe niwami, muukangutayiza ngwe, nguli Mwene Zambi ye.

^21-22 Ha tangwa lize mungukakumbulula ku yilemba ya atu jami Aisraele. Mungukanokesa vula hashi, hashi muhakema mbuto ni vinyu ni olive.

²³ Mungukatumbika atu jami mu chifuchi ni kwawahisa. Mungukazanga waze akwamba ngwo: “Keshi kwazanga.” Kuli waze akwamba ngwo: “Kulikanza,” mungukamba ngwami: “Nuli atu jami.” No maakangwamba ngwo: “Yena uli Zambi yetu.”