Hosea 14 - Mukanda Wa Zambi 1970

Mukwa munanyi Hosea yalembejeka Aisraele

¹ Aa Aisraele, hilukenu kuli Mwene Zambi, Zambi yenu. Shili yenu yinanutalingisa ni kunulimbwisa.

² Hilukenu kama kuli Mwene Zambi, kulemba chino chibwe kama ngwe mulambu ku meso jenyi ngwenu: “Twalemba mwane, tukonekene kama milonga yetu, mba mutukuchichimieka ngwe chize twalakenyene.

³ Aasuria kaahashile kutulamwina, tuvwalu a jita kaahashile kutufunga. Hikutuchi kamba nawa ku mahamba ngwetu, kaali mazambi jetu. Aa Mwene Zambi, yena wakuvwila ana a shiwa keke.”

Mwene Zambi yalakenya Aisraele mwono Waha

⁴ Mwene Zambi kanambe ngwenyi: “Atu jami mungukaahilwisa kuli yami. Mungukaazanga ni mbunge yami yeswe, mumu ufwatulo wami hiwahwa.

⁵ Mungukabwa kuli Aisraele, ngwe mume mu chifuchi chumu. Mba maakatemuka ngwe yitemo; maakatanda miji ngwe mitondo ya ku Libano.

⁶ Maakabwa ngwe mitango yize yinasokoloka, maakabwa abema ngwe mitondo ya olive. Maakabwa ni vumba libema ngwe mitondo sedru ya ku Libano.

⁷ Maakatwama nawa mu chizulie chami. Maakabwa ngwe munda uze unemi mbuto kanawa, ngwe munda wa mihuko yinji ya vinyu. Maakabwa ni lufuma ngwe vinyu ya ku Libano.

⁸ Aisraele keechi kakombelela nawa mahamba; mungukakumbulula ku yilemba yo nikwafunga; mungukabwa kuli ayo ngwe mutondo sedru. Yiwape yo yeswe yakukatuka kuli yami.”

Maliji akusula

⁹ Waze ali ni mana evwe kanawa yuma yize yinasonewa mu mukanda uno, ayifunge mu mbunge. Majila a Mwene Zambi kaali a ululi, akwa ululi kaakwenda mo. Alioze yivulumunyi kaakutalinga, kaakulimbuka, mumu keeshi kwaalula ngwe Chuma.