Hosea 13 - Mukanda Wa Zambi 1970

¹ A mwaka wali, nyi ngwe vungu lia Efraime ahanjika, mavungu akwo ja Aisraele te kaakwevwila woma. Alioze akwa Efraime yaavulumuna, yaawayila Bale, kumaakafwa.

² Ndoo ni musono kaakuvulumuna, kaakulinga tuponya two a prata akutakenya ni manyonga ja atu, akulinga ni moko jo. Mba maamba ngwo: “Alambulenu milambu!” Ngwe kuchi atu maahasa kushisa mahamba waze akulinga ni kulifwa cha makuji a ngombe?

³ Atu wano maakabatwoka ngwangwangwa ngwe mbundu ya chichamene, ngwe mume uze wakukukumuka muze tangwa hiliazunduka. Maakabwa ngwe yizungu yinahehuka ni fuji ku chizungwilo, ngwe mwishi uze unakakumuka ha jiko.

⁴ Mwene Zambi kanambe ngwenyi: “Yami nguli Mwene Zambi, Zambi yenu, yoze wanutuhwishile mu chifuchi cha Egiptu, kunushi ni Zambi mukwo shina yami. Yami wika nguli chilamwina chenu.

⁵ Yami nanufungile mu puya, mu chifuchi chumu.

⁶ Alioze muze hinwanjila mu chifuchi chibema, hinwalia, hinwakuta, henaho yinubutuka kulengumuka ni kunguvulama.

⁷ Kashika mungukanutumbukila ngwe tambwe. Mungukanuswamina mu jila ngwe kolwama.

⁸ Mungukanutumbukila ngwe kashitu munene ursu nyi hamwiya ana, mungukanuhawola. Mungukanulia ngwe chize tambwe akulia kashitu hazehene amukwachilanga. Mungukanubatwola yipinji yipinji ngwe chize akulinga kashitu musasu.

⁹ “Yenu Aisraele mungukanwonona! Tutale yoze makanulamwina!

¹⁰ Nwechile mwanangana ni akwa lutwe, alioze maahasa kulamwina chifuchi nyi?

¹¹ Nanuhele mianangana mu utenu wami, hingunaachiza nawa mu ufwatulo wami.

¹² “Shili ni milonga ya Aisraele haayisoneka, hatulikila yo.

¹³ Israele te hayuka kubwa ni mwono, alioze kali chihepuke, kanyingikine ko kuuzuka. Kali ngwe mwana yoze unambe kusemuka, alioze kasolo kusemuka.

¹⁴ Mungukalamwina atu wano muma lia afu, nyi? Hanji kwapulula ku tachi ja kufwa, nyi? Aa kufwa, jilihi tachi je? Jisoloke! Aa muma lia afu, tachi je jilihi? Jisoloke! Hichichi kevwila nawa atu wano keke.

¹⁵ Chibwe Aisraele maatatuka ngwe manonge, hindu mungukatuma fuji ya chivukuminya ya ku chivumbuko cha ku puya. Muyikomisa mashima jo a meya ni tusulo two twa njiji. Muyikahehula yuma yenyi yeswe yilemu.

¹⁶ Samaria chatamba kumumwesa lamba mumu kakulimika ni yami. Atu jenyi maakafwa mu jita; ana akemba maakaanyasa hashi, ni tufumbakaji maakabuzula.”