Hosea 12 - Mukanda Wa Zambi 1970

¹ Yuma yeswe yize Aisraele akulinga chize ku chichamene ndoo ku chingoloshi yili yamokomoko ni yakwenyeka. Kaakwokesa mahuza ni upupilo. Kaakulinga Usendo ni kulilanjisa yuma ni akwa Egiptu.”

² Mwene Zambi kanasumu Ayuda mulonga. Makamwesa Aisraele lamba mumu ha yitanga yo. Makaafweta nikulita ni yitanga yo.

³ Kashakulu ko Yakoba yaasemuka pasa ni yayo Esau. Muze ayo eswe te achili mu jimo lia naye yaalitachika. Muze Yakoba hatatuka yalitachika nawa ni Zambi,

⁴ yalitachika ni kanganda ka mwilu, yakumba. Yalila, yahula Zambi amuwahise. Zambi yeza nawa kuli kashakulu ketu Yakoba ku limbo lia Betele ni kuhanjika nenyi.

⁵ Yono mwe Mwene Zambi Mukwa Ndundo Jeswe; jina lienyi liakumuwayila nalio Mwene Zambi.

⁶ Kashika yenu vungu lia Yakoba hilukenu kuli Zambi, shachilenu hali iye. Bwenu akwa kushishika ni akwa ululi, nushimbwile ni uhumikizo ndoo ni muze Mwene Zambi malinga chize anapale.

Maliji akwo a lamba lia Aisraele

⁷ Mwene Zambi kanambe ngwenyi: “Aisraele kaakuhengesa ngwe akwa Kanana; kaakuzanga kusepa ubite wo ni pezo ja mahuza.

⁸ Kaakwamba ngwo: ‘Tuli pichi, tuli ni ubite unji. Niumwe mahasa kutusuma mulonga ngwo: tuli ni ubite wa mahuza.’

⁹ Alioze yami, Mwene Zambi, yoze wanutuhwishile mu chifuchi cha Egiptu, mungukanutumbika nawa mu mazuwo jenu a makubu, ngwe chize nwatwamine hatangu muze nejile ni kununangisa mu puya.

¹⁰ “Yinguhanjika kuli akwa munanyi, yingwaha Usolwelo unji, yingukanyamisa atu jami ni maliji ja akwa munanyi.

¹¹ Hindu ndoo ni musono kaakuwayila mahamba ku limbo ha Gileade. Kaakulambula makuji a ngombe ku limbo lia Gilgale. Nyingikenu ngwenu, waze akwaalambula kumaakafwa, ni yilumbilo yo muyikalumbama ngwe mawe mu yambu.”

¹² Kashakulu kenu Yakoba yachinyina ku chifuchi cha Mesopotamia. Kwenako alingilile mutu mukwo, yafunga mapanga hanga amwehe pwo.

¹³ Mwene Zambi yatuma umwe mukwa munanyi atuhwise Aisraele mu undungo mu Egiptu, aafunge.

¹⁴ Aisraele yasosomba Mwene Zambi atenuke, yaalikokela kufwa mumu ha milonga yo. Mwene Zambi makaamwesa lamba mumu amulelesele.