Hosea 11 - Mukanda Wa Zambi 1970

Zambi kanazange atu jenyi yihulia

¹ Mwene Zambi ngwenyi: “Muze Israele te uchili mwana, namuzangile, yingumutambika, ngwe mwanami wa lunga, akatuke mu chifuchi cha Egiptu.

² Cheswe nalikolezele kumutambika, neye Chenacho angumbile nyima kuhiana. Atu jami yaalambula Bale yitapo, yoochela yitumbo ya vumba libema ku mahamba.

³ Hindu yami mwene nalongesele Israele kwenda. Yingukwata atu jami ku moko, yingweendesa, alioze kaatayijile ko ngwo, yami nakwafunga.

⁴ Yingwakoka ni mbunge ya uutu ni zango. Yingwazundula ni kwalembejeka ha matafu jami; yinguhetama hashi ni kwalisa.

⁵ “Kaasolo kuhiluka kuli yami. Kashika chaatamba kuhiluka ku Egiptu. Akwa chifuchi cha Asuria maakaayula.

⁶ Jita muyikabwa mu membo jo ni kuwonda yajilo ya membo hashi. Muyikonona atu jami, mumu alingile chize azangile ayo ene.

⁷ Atu jami haangumba nyima. Maakalila mumu ha kanga lize lili hali ayo, alioze niumwe makaachiza lio.

⁸ “Aisraele, ngwe kuchi ngunahase kunwehuka? Ngwe kuchi ngunahase kunwecha? Munguhasa kunwonona ngwe chize nonwene Adma, nyi? Chibwe kunulinga ngwe chize nalingile Zeboime, nyi? Mbunge yami kuyangutayijile ko kuchilinga! Nakunuzanga kuhiana.

⁹ Chichi kanumwesa lamba mu ufwatulo wami; chichi kwonona nawa Aisraele. Mumu nguli Zambi, hi nguli mutu ko. Yami, mwe munangi, nguli hamwe ni yenu. Chichi kwiza kuli yenu ni ufwatulo.

¹⁰ “Atu jami maakangukaula muze mungukatawoka ngwe tambwe kuli akwa kole jo. Maakatuka ku chitokelo ni kwiza fuji kuli yami nikuhwimashana.

¹¹ Maakakatuka ku Egiptu ni kupekwangila ngwe tujila, ni ku Asuria ngwe membe. Mungukaahilwisa nawa ku mahio. Yami Mwene Zambi nachamba.”

Zambi yahisa Aisraele ni Ayuda

¹² Mwene Zambi kanambe ngwenyi: “Aisraele haanangujingilika ni mahuza ni kwonga, ni Ayuda kaakunyongonona kulimika ni yami, Zambi wa kushishika kanda munangi.