Hosea 10 - Mukanda Wa Zambi 1970

¹ Aisraele kaabwile ngwe mutondo uze unalemenena ni yichakata ya vinyu. Ha kwoka cha yuma yo, yookesa nawa yilumbilo yo. Ha kwoka cha mbuto yo, yookesa nawa mahamba

² Atu waze akwete mbunge jaali, haliabwila chaatamba kumona lamba mumu ha shili yo. Zambi kumakabuzwola yilumbilo yo ni mahamba jo.

³ Atu wano ha shimbu likepe maakamba ngwo: “Kutushi ni mwanangana mumu kutushi kulemesa Mwene Zambi. Chibwe tubwe ni mwanangana mba atulingile yika?”

⁴ Kaakwokesa maliji amokomoko, kaakulakenya alioze keeshi kuyilinga, kaakukolesa Usendo alioze kuushi kulinduluka. Ululi hiwalumuka uhenge, hiwoka ngwe mihuko ya ulembe mu mihanga yakulima.

⁵ Atu waze atwama mu limbo lia Samaria maakevwa woma, maakalila ha kutoka cha kuji a ngombe wa oru wa ku Betele. Ayo ni e mahako waze akuwayila hamba yoze, maakamulilila mbimbi muze uhenya wenyi wa oru haauchiza.

⁶ Mwe hamba maakamutwala kuli mwanangana wa Asuria ngwe mulambu wa mwanangana munene. Aisraele lamba maakamona, maakevwa sonyi mumu ha mana waze te akukaula a uhenge.

⁷ Mwanangana wo maakamumbata ngwe chize chiba chakuhungumuka ha meya.

⁸ Mahamba jo a Avene, ha milundu kuze Aisraele akukombelela, maakabuzula. Mingonga ni yambu yibi muyikatanda he ha yilumbilo yo. Atu maakakololoka ku milundu ngwo: “Tuswekenu kama!” Ni ku mindundena ngwo: “Tufukenu kama!”

Mwene Zambi makamwesa Aisraele lamba

⁹ Mwene Zambi kanambe ngwenyi: “Aisraele ni haliabwila kaasolo kulitwamina kunguvulumuna chize ku tangwa lize anguvulumwine ku limbo lia Gibea. Kashika jita muyikaheta ku Gibea.

¹⁰ Mungukalimika ni yivulumunyi wano ni kwamwesa lamba. Mavungu anji maa kalimika no. Mungukaamwesa lamba mumu ha milonga yo yinji.

¹¹ “Israele kabwile ngwe chimbembe wa ngombe yoze wanyingika kuzungula mbuto kanawa, yevwa kuwaha ha kuchilinga. Alioze yami hingunabatula kumukashila kanga ha kota yenyi yibema ni kumutwika milimo yikalu. Yuda hingunamujichika temo, ni Israele neye hingunamujichika temo lia kuchiba nalio.

¹² Ngwami: ‘Limenu mavu aha, litumbilenu mihuko ya ululi, hanga nuhele mihuko ya yiwape ya kukunjika chenu kuli yami. Tangwa hiliaheta lia kutewulukila kuli yami Mwene Zambi yenu, mba mungunuwahisa.’

¹³ Alioze nwatumbile ungulungulu, yinuhela mihuko yawo. Hinunali mihuko ya ku mahuza jenu. “Mumu nwakujikijila ha matemba jenu ni unji wa tujita twenu,

¹⁴ nyingikenu ngwenu, jita muyikanuheta, ni e membo jenu a tachi kumaabuzwola. Muchibwa ngwe tangwa lize mwanangana Sharmane onwene limbo lia Betarbele mu jita, amama ni e ana jo yaashiha.

¹⁵ Yino yuma ye muyikanuwana yenu, akwa Betele, mumu ha yibi yahiana yize hinwalinga. Muze jita muyikabutuka, mwanangana wa Aisraele makafwa.”