Hebreu 9 - Mukanda Wa Zambi 1970

Uwayilo wa hashi ni wa mwilu

¹ Mu Usendo utangu mwabwile Shimbi hakutwala ku uwayilo, ni hakutwala ku zuwo lia kuwayila Zambi lize atungile atu.

² Yaamika zuwo lia kutunga ni makubu. Chibatulo chitangu yachiluka ngwo, Muma mwa Chijila. Mwenamo mwabwile ndeya, ni mesa, ni mbolo ja kutumbieka ku meso ja Zambi.

³ Kunyima lia chikalakala cha muchaali, mu zuwo kwabwile chibatulo chikwo chize te akuvuluka ngwo, Muma mwa Chijila Kuhiana.

⁴ Mwenemo mwabwile chilumbilo cha oru haze te akwochela maji a vumba libema, ni mushete uze wa Usendo wa Zambi ni atu, mushete uze weswe wakufuka ni oru. Muchima liawo mwabwile mulondo wa oru muze mwabwile yakulia, mana. Mu mushete uze mwabwile nawa lukanda wa Arone, yoze wasokele mafwo, ni mawe aze te akusoneka maliji a Usendo.

⁵ Helu lia mushete uze yihabwa yizulie ya akwa mwono a mwilu ha kulweza ngwo, Zambi kwe ali. Mapulwa jo yaazulamina homa haze te akuhanyina mulambu wa ukonekeno wa milonga. Alioze lino hi shimbu ko liakulumbununa yuma yino yeswe.

⁶ Muze haalujika yuma yize yeswe, mahako te kaakunjila tangwa ha tangwa mu chibatulo chitangu cha zuwo lia makubu ha kumanununa uvumbiko wo.

⁷ Alioze shina mwata wa mahako wakunjila mu chibatulo chize cha muchaali. Kakunjila mo shina chisuho chimuwika ha mwaka. Chamutamba kuya mo ni manyinga ja tushitu ha kulambula mulambu kuli Zambi. Kakuchilinga ha kumukonekena milonga yenyi mwene ni ya atu akwo nawa, yize te akulinga kuyinyingika ka.

⁸ Mwiku wa Linanga wakulweza ngwenyi, niumwe mahasa kunjila Muma mwa Chijila Kuhiana shimbu te zuwo lia makubu Unamana.

⁹ Chino chili chizulie cha mwakono. Chinalumbunuka ngwo, yawana ni milambu ya tushitu yize mutu akulambula kuli Zambi kuyahashile kupwisa mukwa kuwayila mungunu.

¹⁰ Yili lume yikuma ya kulia ni kunwa, ni kusana cheka ni cheka. Yili lume Shimbi ja mujimba jize chatamba kujifunga lume ndoo muze Zambi makalulika yuma yeswe.

¹¹ Alioze Kristu wejile kulu hanga abwe Mwata wa mahako ha yiwape ya mwakono. Zuwo lia makubu muze akumanunwina uvumbiko kuliahiana libema ni lingunu. Kaalitungile ko kuli atu, kulumbunuka ngwo, hi lia hano hashi ko.

¹² Muze Kristu hananjila chisuho chimuwika Muma mwa Chijila Kuhiana, kahanyine ko mulambu wa manyinga a pembe hanji manyinga ja ana a ngombe. Alioze yahana manyinga jenyi mwene, mulambu ha kutulamwina ku miaka yeswe.

¹³ Kakuhinjila manyinga a pembe ni a kuji a ngombe, ni uto wa chimbembe, hali akwa luchisa. Kakuchilinga ha kujilula Shimbi jo ja mujimba.

¹⁴ Nyi chili Chenacho, manyinga a Kristu kaanahiana tachi! Ku tachi ja Mwiku wa miaka yeswe hanalikunjika kuli Zambi ngwe mulambu ungunu. Manyinga jenyi mabemesa mbunge jetu ku yitanga yamokomoko, hanga tukahase kvumbika Zambi ya mwono.

¹⁵ Kashika Kristu kali Chitakanyishi cha Usendo Waha, hanga waze Zambi hanatambika ahase kutambula yiwape ya miaka yeswe yize Zambi alakenyene. Maahasa kuyitambula mumu Kristu hanafu, ni kufwa chenyi chakulamwina atu ku milonga yize alingile muze ononokene ku Usendo uze utangu.

¹⁶ Usendo uze Zambi akulikwata ni atu, uli ngwe kushika cha mutu yoze unambe kufwa. Kashika kushika chize chakukola lume muze atu haashindakenya ngwo, yoze wachishikile hafwa.

¹⁷ Mumu atu kaahashile kutayiza kushika chize nyi yoze wachishikile uchili ni mwono. Alioze machitayiza shina muze mutu hafwa.

¹⁸ Chenacho atu yaabutuka kwononokena Usendo utangu shina muze te Mose halambula mulambu wa manyinga.

¹⁹ Hatangu Mose yahanjika ku meso ja atu maliji eswe a Shimbi ha kujifunga, mba yanda manyinga ja ana a ngombe ni meya, yayisapwila ha mukanda wa Shimbi ni hali atu eswe ni chisapwilo cha mwambu ni ngona jichila ja panga.

²⁰ Yamba ngwenyi: “Wano e manyinga anakolesa Usendo uze Zambi hananwambe ha kuwononokena.”

²¹ Chizechene nawa Mose yamwangina manyinga ha zuwo lia makubu ni ha yuma yeswe yize te akulinga nayo ha kuwayila.

²² Nikulita ni Shimbi, yuma yinji kaakuyibemesa ni manyinga. Zambi kahashile kukonekena milonga nyi manyinga kaamwanganyine.

Kristu hanalilambula ha kuchiza shili

²³ Yuma yino yeswe yili yizulie ya yuma yamwenemwene yize yili mwilu. Manyinga a tushitu maahasa kubemesa yuma yino ya hashi. Alioze yuma yamwenemwene yize yili mwilu chayitamba kubwa ni milambu ya manyinga yize yinahiana kubema.

²⁴ Mumu Kristu kanjilile ko Muma mwa Chijila Kuhiana mwakutunga ni moko ja atu, muma muze muli lume chizulie cha umwenemwene. Alioze yanjila lume mwe mwilu, muze akusoloka ku meso ja Zambi ha kutuhakwila.

²⁵ Mwata wa mahako wa Ayuda kakunjila Muma mwa Chijila Kuhiana mwaka ni mwaka ha kulambula mulambu wa manyinga a kashitu. Alioze Kristu kanjilile mo yisuho yinji ha kulilambula iye mwene.

²⁶ Nyi hachlinga yisuho yinji, kachi chamutamba kumona lamba kanji kuze ku kabutu ka hashi ndoo musono uno. Alioze haliabwila, muze miaka hiyabwa hakamwihi ni kuhwa, hanasoloka kuli atu chisuho chimuwika wika, ha kulilambula iye mwene ha kuchiza shili.

²⁷ Mutu mweswe chamutamba kufwa chisuho chimuwika, mba Zambi makamubatwila.

²⁸ Chimuwika nawa, Kristu yalihana mulambu chisuho chimuwika ha kuchiza shili ya atu anji. Makasoloka kuli atu chisuho cha muchaali, hi kuchiza shili ya atu ko, alioze ha kulamwina waze akumushimbwila.