Hebreu 8 - Mukanda Wa Zambi 1970

Usendo wa Yesu unahiana Usendo ukwo

¹ Chikuma chinene chize tunambe chili chino ngwetu, mwata wa mahako ngwe yono tuli nenyi, yoze watwama mwilu ku chindume ha chitwamo cha wanangana wa Zambi, Mukwa Ndundo Jeswe.

² Kakulinga milimo ya mwata wa mahako Muma mwa Chijila, kulumbunuka ngwo, mu zuwo liamwenemwene, lize atungile Mwene Zambi, hi atu ko.

³ Mwata wa mahako mweswe milimo yenyi kuhana yawana ni kulambula milambu kuli Zambi. Mwata wetu wa mahako neye chamutamba kulambula chimwe Chuma.

⁴ Te nyi kali hano hashi, kachi kechi kubwa hako, mumu mahako kwali waze akuhana yawana kuli Zambi nikulita ni Shimbi ja Ayuda.

⁵ Milimo yize akulinga mahako yili lume ngwe yizulie ya yuma yamwenemwene yize yili mwilu. Yili ngwe yize yabwile ha tangwa lia Mose. Muze azangile kutunga zuwo lia makubu, Zambi yamwamba ngwenyi: “Ha kutunga zuwo liami, imbulula lume yuma yeswe yize nakulwezele ha mulundu.”

⁶ Alioze haliabwila Zambi hamwaha Yesu milimo yinahiana yize ya mahako waze, mumu kali chitakanyishi cha Usendo uze unahiana, uze asele ha yilakenyo yibema yahiana.

⁷ Nyi Usendo utangu kuwabwile ni chitela, kachi atu kaafupile ko nawa Usendo wa muchaali.

⁸ Alioze Zambi kanamono yitela ya atu jenyi. Kashika kanambe ngwenyi: “Ku matangwa ja kulutwe mungukalikata Usendo ukwo Waha ni vungu lia Israele, ni chikota cha Yuda nawa.

⁹ Usendo uno kuuchi kabwa ngwe uze nalikachile ni tushakulu two. Ha tangwa lize naakwachile ku moko ni kwatuhwisa mu chifuchi cha Egiptu. Kaabwile ko akwa kushishika mu Usendo uze nalikachile no, kashika neehukile.

¹⁰ Uno we Usendo mungukalikata ni Aisraele kulutwe lia matangwa waze: Mungukasa Shimbi jami mu manyonga jo. Mba mungukajisoneka mu mbunge jo. Mungukabwa Zambi yo, no maakabwa atu jami.

¹¹ Mutu niumwe makalongesa nawa mwenyembo wenyi. Mutu niumwe makambila nawa mwenyembo wenyi ngwenyi: ‘Nyingika Mwene Zambi.’ Mumu atu eswe maakangunyingika, chize kuli twanuke ndoo kuli makulwana.

¹² Ku keke yami mungukaakonekena uhenge wo. Chichi kewuluka nawa milonga yo.”

¹³ Muze Zambi ahanjikile hakutwala ku Usendo Waha, Usendo utangu yaupwisa ngwe Ukulu. Yuma yikulu ni yize hiyahuliwa yili hakamwihi ni kutoka.