Hebreu 7 - Mukanda Wa Zambi 1970

Melkizedeke mwanangana kanda hako

¹ Melkizedeke yono wabwile mwanangana wa Saleme kanda hako wa Zambi Mwilu Mwahiana. Muze te Abrahama anahiluka ku jita yize akumbile mianangana, Melkizedeke yamutakana, mba yamuwahisa.

² Abrahama yamwaha Chihanda chakumi cha yeswe yize te abwile nayo. (Ulumbunwiso wa jina lia Melkizedeke ngwo, mwanangana wa ululi. Mumu wabwile mwanangana wa Saleme, jina lienyi linalumbunuka nawa ngwo, mwanangana wa uhwimino.)

³ Atu te kaanyingikine jina lia tato ya Melkizedeke, chibwe jina lia naye, chibwe jina lia umwe kashakulu kenyi. Te kaanyingikine kuze asemukinyine, chibwe kuze afwilile. Kali ngwe Mwana Zambi, kali hako wa miaka yeswe.

⁴ Talenu unene wenyi! Kashakulu Abrahama yamwaha chakumi cha yeswe yize atambwile mu jita.

⁵ Atu a ku Chikota cha Levi, waze akubwa mahako, kaakutambula chakumi kuli Aisraele nikulita ni Shimbi. Kafwa ngwe, kaakuchitambula kuli usoko wo, chibwe ayo eswe kaali a ku vungu lia Abrahama.

⁶ Melkizedeke hi wa ku Chikota cha Levi ko, alioze yatambula chakumi kuli Abrahama. Melkizedeke yawahisa Abrahama, yoze watambwile yilakenyo ya Zambi.

⁷ Chatutamba kutayiza lume ngwetu, munene kakuwahisa mukepe.

⁸ Mahako waze akutambula chakumi kaakufwa. Alioze Melkizedeke yoze watambwile chakumi, katwama ni mwono ngwe chize unambe Mukanda wa Zambi.

⁹ Kafwa ngwe, muze Abrahama ahanyine Chihanda cha kumi, Levi neye yachihana. (Haliabwila atu a ku Chikota cha Levi ayo ene kaakutambula chakumi.)

¹⁰ Ha tangwa lize Levi te kanda achisemuka, alioze yabwa ngwe ku mitanda ya kako Abrahama muze Melkizedeke abatwijile mwe Abrahama.

¹¹ Muze Zambi ahele Aisraele Shimbi, yaaha nawa Shimbi jikwo ja mahako a ku Chikota cha Levi. Nyi mahako waze milimo yingunu alingile, kachi Aisraele te kuchaatambile kubwa ni hako mukwo weka wa ku ngango ya Melkizedeke, yoze hi wa ku ngango ya Arone ko.

¹² Mumu, nyi te haalumuna mahako, chaatamba nawa kwalumuna Shimbi.

¹³ Kaakwamba yuma yino hakutwala kuli Mwene wetu Yesu, yoze te wa ku Chikota cheka. Mutu niumwe wa ku Chikota chize te wakulinga milimo ya hako ku chilumbilo cha Zambi.

¹⁴ Atu eswe kaananyingika kanawa ngwo, Yesu ku Chikota cha Yuda asemukinyine. Alioze Mose kambile nichimwe hakutwala ku Chikota chize muze ahanjikile hakutwala kuli mahako.

Hako mukwo walifwa ni Melkizedeke

¹⁵ Atu maahasa kunyingika yuma yino kanawa, mumu hako mukwo hanasoloka yoze walifwa ni Melkizedeke.

¹⁶ Kaamupwishile ko hako nikulita ni Shimbi ja atu. Yabwa hako ku tachi ja mwono wenyi uze kuushi kuhwa.

¹⁷ Mumu Mukanda wa Zambi unambe ngwo: “Muukabwa hako ku miaka yeswe mu ngango ya Melkizedeke.”

¹⁸ Kashika Zambi yonona Shimbi jikulu, mumu jabwile jilelu ni kujafumbwile nichimwe.

¹⁹ Mumu Shimbi ja Mose kujapwishile ko mutu niumwe mungunu. Alioze haliabwila twakusa mbunge ku yuma yize yinahiana kubema. Kashika tunahase kukundama kuli Zambi.

²⁰ Chikwo nawa Shingo lia Zambi kulili. Atu akwo yaapwisa mahako, keeshi Shingo yize.

²¹ Alioze Zambi hanapwisa Yesu hako ni Shingo muze ambile ngwenyi: “Yami, Mwene Zambi, ngunalishingi, chichi kwalumuna ngwami: ‘Mukabwa hako ku miaka yeswe.’ ”

²² Ha chino, Yesu kali nawa chifungo cha Usendo Wahiana kubema.

²³ Kukuli nawa kulisa chikwo: mahako akwo abwile anji, yaafwafwa. Kashika kaahashile kunyongonona mu milimo yo.

²⁴ Alioze Yesu katwama ni mwono ku miaka yeswe, ni milimo yenyi ya kuhakwila kayihanyine ko kuli mukwo.

²⁵ Kashika mahasa kulamwina, haliabwila ni ku miaka yeswe, waze akukundama kuli Zambi mu jina lienyi, mumu katwama ni mwono matangwa eswe ha kwahakwila.

²⁶ Yesu kanatela kubwa mwata wa mahako. Kali munangi, keshi chibeka nichimwe, keshi shili. Zambi hanamuhandununa kuli yivulumunyi, hanamuzundula helu lia lilu.

²⁷ Yesu keshi ngwe miata akwo a mahako. Kuchamutambile kulambula milambu tangwa ha tangwa, hatangu ha milonga yenyi mba ha milonga ya atu akwo. Yalambula mulambu umuwika, chisuho chimuwika, hali atu eswe, muze alikunjikile mwene.

²⁸ Shimbi ja Mose kujakutongola akwa kukokoloka ha kubwa miata a mahako. Alioze muze Shimbi ja Mose jabwile kulu, Zambi yashinga nikutongola Mwanenyi, yoze hanapwisa mungunu ku miaka yeswe.