Hebreu 6 - Mukanda Wa Zambi 1970

¹ Haliabwila tulikolezenu ni kuya kulutwe, tulilongesenu ndako ja ukulwana, twehukenu yikuma yitangu ya ufulielo wetu. Kutwahashile kuhiluka nawa ku kabutu ka longeso lize, ngwe: kwehuka yitanga yamokomoko, ni kufuliela Zambi,

² ni upapachiso weka ni weka, ni kusa moko hali atu, ni uhindukilo wa afu, ni ubatwilo wa miaka yeswe.

³ Tulikolezenu ni kuya kulutwe! Chenacho mutulinga, nyi Zambi matayiza.

⁴ Kuchi hali atu waze haanapianguka, maahasa kwalumuka nawa ku mbunge? Hatangu te akwa pangu yaapaka chawana cha mwilu, yaatambula Chihanda cha Mwiku wa Linanga,

⁵ yaanyingika ngwo, maliji a Zambi kaali abema ni yaamona tachi jize mujikeza kulutwe,

⁶ mba yaapianguka! Keechi kuhasa kwahilwisa nawa hanga alumuke ku mbunge. Mumu yuma yize akulinga yili ngwe kuhata Mwana Zambi ha kulusu chisuho cha muchaali, ni kumukolesa sonyi ku meso ja atu.

⁷ Zambi kakuwahisa hashi. He hashi kuhakumina vula yoze wakunoka ho tangwa ha tangwa, ni kuhakusoka yilimalima ya atu waze akulima ho.

⁸ Alioze, nyi hashi kuhakusoka mingonga ni yambu yamokomoko, hali lume hamokomoko. Ha shimbu likepe Zambi makashinga ho ni hashi muhakawema.

⁹ Alioze akwetu, chibwe tunahanjika chocho, hindu tunanufuliela. Tunanyingika ngwetu, nuli ni yiwape yize yinahiana ya ulamwino wenu.

¹⁰ Zambi hi chihenge ko. Kechi kavulama yitanga yenu, chibwe zango lize hinunamulweze ha kukwasa akwenu akwa Kristu, ni ndoo musono nwakwakwasa.

¹¹ Alioze tunazange ni mbunge yeswe ngwetu, mutu ni mutu hakachi kenu alikoleze ndoo ku songo, hanga nukazuke yuma yize nwakusa mbunge.

¹² Kutwazangile nubwe akwa ngwaza, alioze bwenu akwa kufuliela, yihumikiji, hanga nukatambule yuma yize Zambi hanalakenya.

Chilakenyo chamwenemwene cha Zambi

¹³ Muze Zambi alakenyene Abrahama, yachilinga ni Shingo. Ngwe chize kukwabwile munene Wahiana iye, yalishinga ni jina lienyi mwene,

¹⁴ ngwenyi: “Chamwenemwene kuwahisa mungukakuwahisa, mungukokesa vungu lie.”

¹⁵ Abrahama yashimbwila ni uhumikizo, kashika yatambula yize Zambi hanamulakenya.

¹⁶ Muze atu akulishinga, kaakuchilinga ni jina lia umwe munene Wahiana ayo. Ni Shingo lize hakuchiza pami mukachi ka atu.

¹⁷ Zambi yazanga kulweza akwa chilakenyo mwazu ngwenyi, kumalinga nikulita ni chilakenyo chenyi, kechi kwalumuna. Kashika yawezela Shingo ku chilakenyo.

¹⁸ Kukuli yuma yaali yize kuyahashile kwalumuka, ni hakutwala ku yize Zambi kahashile kuhanjika mahuza. Kashika yetu hitunachinyina kuli iye; tuli ni hamu lia kukakaminya ha kusa mbunge ku chize hanatulakenya.

¹⁹ Yuma yize twakusa mbunge yili ngwe kwachiliji ja ulungu mu mbunge jetu. Yili yamwenemwene ni ya tachi. Yinanjila ndusu mu chikalakala cha hina mu zuwo lia Zambi mwilu. Yinanjila ndoo mu chibatulo cha muchima.

²⁰ Yesu hanaliange kunjila mo mumu hali yetu. Hanabu mwata wa mahako ku miaka yeswe, ni ngango yimuwika ni yize ya Melkizedeke.