Hebreu 5 - Mukanda Wa Zambi 1970

¹ Mwata wa mahako mweswe kaakumutongola mukachi ka atu ni kumusa hanga alingile Zambi hali atu jenyi. Kakulambula yawana ni milambu ha milonga.

² Ngwe chize iye mwene kali mulelu, mahasa kulihumikiza ni akwa kwalajala ni akwa kukokoloka.

³ Mumu iye mwene kali mulelu, kashika chamutamba kulambula milambu, hi ha milonga ya atu akwo wika ko, alioze nawa ha milonga yenyi mwene.

⁴ Mutu niumwe wakulitongwela ulemu wa kubwa mwata wa mahako, shina ku kutambika cha Zambi, ngwe chize atambikile Arone.

⁵ Chimuwika nawa ni Kristu. Kalitongwelele ko ulemu wa kubwa mwata wa mahako. Alioze Zambi wamwambile ngwenyi: “Yena uli Mwanami. Hinakusema musono uno.”

⁶ Mu Chihanda chikwo kanambe ngwenyi: “Yena muukabwa hako wa miaka yeswe, mu ngango yimuwika ni yize ya Melkizedeke.”

⁷ Muze Yesu abwile hano hashi te kakulemba Tato yoze mahasa mwina ku kufwa, te kakulemba ni kukololoka ni masoji ku meso. Neye yamuvwila mumu ha kwononoka chenyi.

⁸ Chibwe wabwile mwe Mwana Zambi, hindu yalilongesa kwononokena Zambi ha lamba lize heswe te akumona.

⁹ Chize ku tangwa lize hamupwisa mungunu, eswe waze akumwononokena kakwalamwina ku miaka yeswe.

¹⁰ Zambi hanamupwisa Mwata wa mahako mu ngango yimuwika ni yize ya Melkizedeke.

Kanda nwehuka ufulielo wenu

¹¹ Yuma yinji tuli nayo ha kunwambulwila, alioze chikalu kunulumbunwina yo kanawa mumu nuli tujika matwi.

¹² Miaka yinji yabalika kulu, kachi te hinunabu kulu alongeshi, hindu chatamba umwe kunulongesa yikuma yitangu ya maliji a Zambi. Shimbu lize te chanutamba kulia yakulia yamwenemwene, hindu nuchili waze chaatamba kunwa yamwa.

¹³ Mutu yoze wakunwa lume yamwa kali mwana kemba. Kanda anyingika kusakula ngwenyi, achi chibema, achi chibi.

¹⁴ Shina makulwana e atela kulia yakulia yamwenemwene, mumu haanejilila tangwa ha tangwa kusa chinyingi hakachi ka yibema ni yibi.