Hebreu 4 - Mukanda Wa Zambi 1970

¹ Zambi hanatulakenya chilakenyo ngwenyi, mutuhasa kunjila mu uhwimino wenyi. Twivwenu woma, nyi ka, umwe hakachi kenu mahona kunjila mu uhwimino uze.

² Mumu ni yetu nawa hitunevu Sango Jibema ngwe ayo. Alioze Sango jino kujaakwashile, mumu muze ajivwile, kaajifulielele ko.

³ Yetu akwa kufuliela tunanjila mu uhwimino wa Zambi, mumu yamba ngwenyi: “Ufwatulo nevwile, mba yinguhala ngwami, keechi kanjila nichimwe mu uhwimino wami!” Chino yachamba chibwe milimo yenyi te hiyinahu kulu chize ku kutanga cha hashi.

⁴ Mumu, mu Chihanda chikwo cha Mukanda wa Zambi, umwe yasoneka maliji wano hakutwala ku tangwa lia muchishimbiali ngwenyi: “Ha tangwa lia muchishimbiali Zambi yamanununa milimo yenyi yeswe, mba yahwima.

⁵ Mu Chihanda chikwo cha Mukanda wa Zambi, mutu mukwo hanasoneka nawa hakutwala ku tangwa likwo lia uhwimino.

⁶ Atu waze evwile Sango Jibema hatangu kaanjilile ko mu uhwimino wa Zambi, mumu kaafulielele ko. Ha chino, atu akwo maahasa kunjila mo.

⁷ Kashika Zambi hasa tangwa likwo lize anavuluka ngwenyi: “Musono.” Kulutwe lia miaka yinji yahanjika kuli David mu Mukanda wa Miaso (Masamu) ngwenyi: “Musono, nyi munwivwa liji liami, kanda nukalisa mbunge jenu.”

⁸ Mumu, nyi Yoshua wahetesele Aisraele mu chifuchi cha uhwimino, kachi kulutwe Zambi kahanjikile ko nawa hakutwala ku tangwa likwo lia uhwimino.

⁹ Chino chinalumbunuka ngwo, atu ja Zambi maakahwima. Kuhwima chize muchikabwa ngwe chize ahwimine Zambi ha tangwa lia muchishimbiali.

¹⁰ Mumu mweswe yoze manjila mu uhwimino wa Zambi, kakuhwima hakutwala ku milimo yenyi mwene, ngwe chize Zambi ahwimine ku milimo yenyi.

¹¹ Tulikolezenu hanga tunjile mu uhwimino wa Zambi. Kanda tulifwa ni waze koononokene ko ni kaanjilile ko mu chifuchi cha uhwimino.

¹² Mumu liji lia Zambi mwono likwete, ni liakulinga matangwa eswe. Kuliambuka kuhiana mukwale. Kuliakuheta ndoo haze halitakanyina mwono ni mwiku, ni ndoo haze halitakanyina makonekeno ni usongosongo. Kuliakubatula usolo ni manyonga a mu mbunge ja atu.

¹³ Mutu kahashile kuswekela Zambi Chuma nichimwe. Zambi kakumona yuma yeswe, mumu yuma yeswe kuyakusoloka zwalala, kuyishi kuswama ku meso jenyi. Kuli iye mutukalumbununa yuma yeswe yize twalingile.

Yesu mwe mwata wa mahako a Zambi

¹⁴ Tukakaminyenu kanawa ku longeso lietu, mumu tuli ni Mwata wa mahako a Zambi yoze hanahete ndoo ni ku meso ja Zambi—mwe Yesu Mwana Zambi.

¹⁵ Mwata wa mahako a Zambi kakumona lamba hamwe ni yetu mu ulelu wetu. Mumu Sakwonga hanamweseka mu yuma yeswe ngwe chize akweseka nawa yetu, alioze kavulumwine ko.

¹⁶ Kashika tukundamenu ni hamu ku chitwamo cha wanangana wa Zambi, ku chitwamo chenyi kuze akulwezela utu wenyi. Kuze mutuwana keke ni utu yize yinalite ni kutukwasa ha tangwa lia kuhona.