Hebreu 3 - Mukanda Wa Zambi 1970

Yesu kanahiana Mose

¹ Kashika akwetu, yenu waze Zambi hanatambika, chanutamba kunyonga Yesu, yoze Zambi hanatumu hanga abwe Mwata wa mahako ja Zambi hakutwala ku ufulielo wetu.

² Mumu wabwile mukwa kushishika kuli Zambi yoze wamutongwele ha milimo yino, ngwe Mose wabwile mukwa kushishika ha kumanununa cha milimo yenyi mu zuwo heswe lia Zambi.

³ Mutu yoze wakutunga zuwo, atu kaakumulemesa kuhiana lie zuwo lize anatungu. Chimuwika nawa Yesu kanatela uhenya Wahiana uze wa Mose.

⁴ Kuma zuwo heswe mutu wakulitunga, ni Zambi mwe watangile yuma yeswe.

⁵ Mose wabwile mukwa kushishika mu zuwo lieswe lia Zambi. Te kakulingila Zambi ni kuhanjika yuma yize te Zambi makahanjika ku matangwa a kulutwe.

⁶ Alioze Kristu kali mukwa kushishika mumu kali Mwana Zambi yoze asele ha kuyula zuwo lieswe ha Zambi. Tuli ngwe zuwo lienyi, nyi twakufunga shindakenyo yetu ni kunyongonona kufuliela chize twakusa mbunge.

Atu ja Zambi maakahwima

⁷ Kashika Mwiku wa Linanga unambe ngwenyi: “Musono nyi munwivwa liji liami,

⁸ kanda nukalisa mbunge jenu ngwe chize nwalingile hatangu muze nwahamikine ni yami, ngwe chize nwalingile tangwa lize nwangwesekele mu puya.

⁹ Chibwe tushakulu twenu amwene chize te nakulinga kuze ha miaka makumi awana, hindu yaangweseka.

¹⁰ Kashika naavutwokelele. Yingwamba ngwami: ‘Matangwa eswe kaakupianguka mu kunyonga cho. Kaanyingikine majila jami.’

¹¹ Yingwivwa ufwatulo, yingulishinga ngwami: ‘Keechi kanjila nichimwe mu chifuchi cha uhwimino chize nanulakenyene!’ ”

¹² Akwetu, kanyamenu! Niumwe kanda abwa ni mbunge ya ungulungulu chibwe ya kuyambashana. Nyi ka, malituna Zambi ya mwono.

¹³ Alioze tangwa ha tangwa litakamisenu ni akwenu, hanga shili kuyichi kwonga niumwe hakachi kenu, kuchina makalisa mbunge yenyi. Matangwa eswe muze munwivwa ngwo: “musono,” chanutamba kulishinjila ni akwenu.

¹⁴ Mumu tuli akwa milimo ni akwo ni Kristu, nyi twakunyongonona ndoo ku songo ngwe chize twafulielele ku kabutu.

¹⁵ “Musono, nyi munwivwa liji liami, kanda nukalisa mbunge jenu ngwe chize nwalingile hatangu muze nwalitunyine yami, Chenacho anambe Zambi.”

¹⁶ Atu waze evwile liji lia Zambi, hindu yaamulituna, aya? Eswe waze Mose asongwelele muze akatukile mu chifuchi cha Egiptu.

¹⁷ Atu waze Zambi evwilile ufwatulo miaka makumi awana, aya? Waze ene avulumwine, waze afwilefwile mu puya.

¹⁸ Zambi, atu aya ahalilile ngwenyi: “Keechi kanjila mu chifuchi ni kuhwima hamwe ni yami”? Waze amulitunyine.

¹⁹ Tunamono ngwetu, kaatelele kunjila mo mumu kaamufulielele ko.