Hebreu 2 - Mukanda Wa Zambi 1970

Ulamwino unene

¹ Kashika, chatutamba kwononokena kanawa yuma yamwenemwene yize twevwile. Nyi ka, mutupianguka.

² Shimbi jize Zambi alongesele kuli tunganda a mwilu te jamwenemwene. Mweswawo te keshi kujifunga ni kujononokena, hanatambula lamba lize linamutela.

³ Ngwe kuchi mutuhasa kuchina lamba ngwe lize, nyi twakulelesa ulamwino ubwa haha? Hatangu Mwene Yesu iye mwene walongesele sango jize, mba waze amuvwile yaashindakenya ngwo, ulamwino uno uli wamwenemwene.

⁴ Mwaka uzewene Zambi yalweza yilayi, ni yipekesa, ni yipupu yeka ni yeka ha kulweza ngwo, hatayiza yuma yize te akwamba. Ku upale wenyi yaalianyina yawana yeka ni yeka ya Mwiku wenyi.

Yesu wakutwala atu mu jila ya ulamwino

⁵ Mumu Zambi kasele ko tunganda a mwilu ha kuyula hashi haze te himatanga—hashi haze tunambe.

⁶ Alioze mu Chihanda chikwo mu Mukanda wa Zambi umwe mutu hanasoneka ngwenyi: “Aa Zambi, mutu kali iya, mba umunyongene? Mwana mutu kali iya, mba umufunge?

⁷ Shimbu likepe hiunamupwisa kushi lia tunganda a mwilu, hiunamwehe uhenya ni ulemu Wahiana.

⁸ Hiunazeyesa yuma yeswe kushi lia molu jenyi.” Muze mamba ngwo: Zambi “hanazeyesa yuma yeswe kushi lia molu jenyi,” yili yeswe lume. Alioze kanda tuchimona ngwo, haliabwila yuma hiyamuzeyela.

⁹ Alioze tunamono Yesu. Shimbu likepe Zambi yamusa kushi lia tunganda a mwilu, hanga, ku utu wa Zambi, afwile atu eswe. Haliabwila tunamumono ni uhenya ni ulemu Wahiana, mumu ha lamba lia kufwa lize amwene.

¹⁰ Chabwile chibema ngwo, Zambi yoze watangile yuma yeswe ni wakuyikwata, apwise Yesu mungunu ha lamba lize amwene. Chino Zambi yachilinga ha kusenyesa atu anji ha kuzuka kamwe ka uhenya wenyi. Mumu Yesu mwe wakwalamwina.

¹¹ Yesu wakupwisa atu akwa kulinanga hakutwala ku yibi yo. Mba iye ni ayo Tata umuwika akwete. Kashika Yesu keshi kwivwa sonyi ha kwavuluka ngwenyi: “Akwetu.”

¹² Kanambe ngwenyi: “Mungwambulwila atu jami yize hiunalingi, mungukuhalisa mukachi ka Chikungulwila.”

¹³ Kanambe nawa ngwenyi: “Mungufuliela Zambi.” Nawa ngwenyi: “Yami uno, hamwe ni ana waze anguhele Zambi.”

¹⁴ Ana waze musunya ni manyinga akwete. Kashika Yesu neye yalumuka mutu yoze uli ni musunya ni manyinga ngwe ayo. Yalumuka mutu hanga, ku kufwa chenyi, akafwenye Sakwonga yoze ukwete chiyulo cha kufwa,

¹⁵ ni hanga akapulule waze abwile ndungo mu mwono wo weswe mumu ha woma wa kufwa.

¹⁶ Kafwa ngwe, hi tunganda a mwilu ko Zambi akukwasa, alioze ngwe Mukanda wa Zambi unambe ngwo: “Kakukwasa vungu lia Abrahama.”

¹⁷ Chinalumbunuka ngwo, Yesu chamutamba kulifwa ni ana akwo ha yuma yeswe, hanga akabwe mwata wa mahako ku meso ja Zambi, mukwa kushishika yoze wakuvwila atu keke, hanga akaukule ku milonga yo.

¹⁸ Yesu iye mwene hanamono lamba, ni Sakwonga hanamweseka. Kashika mahasa kukwasa nawa atu waze Sakwonga akweseka.