Hebreu 13 - Mukanda Wa Zambi 1970

Chize chatamba kuwahilisa Zambi

¹ Nyongononenu ni kulizanga ni akwenu akwa Kristu.

² Kanda nuvulama kuzumbula ngeji. Mumu, ha kulinga chino amwe haanazumbula tunganda wa mwilu, alioze te kaachinyingikine ko.

³ Iwulukenu waze ali mu zuwo lia lamba ngwe nuli no hamuwika. Iwulukenu waze akumona lamba ngwe nunamono lamba hamwe no.

⁴ Atu eswe alemese umbachiso. Waze haanalimbata abwe akwa kushishika, chibwe pwo, hanji lunga, Zambi makahisa waze akulinga utanji, chibwe kulinga utanji ni waze haanalimbata, hanji ni waze kanda achilimbata.

⁵ Mu mwono wenu, kanda nubwa ni lwahu wa mbongo, alioze wahililenu ni yuma yize nuli nayo kulu. Mumu Zambi iye mwene hanambe ngwenyi: “Chichi kakwecha nichimwe, chibwe chichi kakwehuka nichimwe.”

⁶ Kashika tuhamukenu ni kwamba ngwetu: “Mwene Zambi kali chikwashi chami, chichi kwivwa woma nichimwe! Atu yika maangulinga?”

⁷ Iwulukenu tetekeli jenu atangu a mu Chikungulwila, waze anulongesele maliji a Zambi. Iwulukenu chize atwamine ni chize afwile. Imbululenu ufulielo wo.

⁸ Yesu Kristu chizechene zau, ni musono, ni ndoo ku miaka yeswe.

⁹ Longeso lieka ni lieka kanda linupiangula. Mbunge jetu jitakame ni utu wa Zambi. Kujahashile kutakama ha kufunga Shimbi jeka ni jeka hakutwala ku kulia. Shimbi jize kujishi kukwasa nichimwe waze akujifunga.

¹⁰ Mahako a Zambi, waze akuvumbika mu zuwo lia kuwayila lia Ayuda, keeshi ni chiyulo cha kutambula chimwe Chihanda cha yakulia ya mulambu wa ha chilumbilo chetu.

¹¹ Mwata wa mahako ja Ayuda kakutwala manyinga ja tushitu Muma Mwa Chijila Kuhiana ha kulambula mulambu uze wakuchiza shili. Alioze mijimba ya tushitu waze kaakuyochela haze lia limbo.

¹² Kashika, Yesu neye yafwila haze lia limbo ha kubemesa atu ni manyinga jenyi mwene.

¹³ Kashika tuyenu haze lia limbo ni kumbata luchoko yoze amuchokele Yesu.

¹⁴ Mumu kutushi limbo lia kulinduluka hano hashi, alioze twakufupa limbo lize muliza ho.

¹⁵ Tuchichimiekenu Zambi matangwa eswe, kuchichimieka chize chili ngwe mulambu mu jina lia Yesu. Kulumbunuka ngwo, tuchichimiekenu Zambi tangwa ha tangwa ni makanwa jetu.

¹⁶ Kanda nuvulama kulinga yibema ni kulikwasa ni akwenu, mumu yino ye milambu yakubemena ku meso ja Zambi.

¹⁷ Ononokenenu tetekeli jenu mu Chikungulwila, azeyelenu. Mumu kaakulayiza mwono wenu, mumu ayo maakalumbununa uvumbiko wo kuli Zambi. Nyi nwoononokena, maakamanuna milimo yo ni uwahilio. Nyi ka, maakayimanununa ni chinyengo. Chuma chize kuchichi kanukwasa nichimwe.

¹⁸ Nyongononenu ni kutulembela Zambi. Tunanyingika kanawa ngwetu, tuli ni manyonga waze keeshi uhiso, mumu tunazange kulinga kanawa matangwa eswe.

¹⁹ Ngunaliumbu kuli yenu kuhiana ngwami, ngulembelenu, hanga Zambi angutayize kuhiluka nikawashi kuli yenu.

Kulemba

^20-21 Zambi hanahindwisa Mwene wetu Yesu ku kufwa. Mumu ha kufwa chenyi Yesu hanalumuka Kafunga Munene wa mapanga ku manyinga ja Usendo wa miaka yeswe. Zambi ya uhwimino anukolese ni kulinga yuma yeswe yize yinatela ha kumanununa chize anapale. Alinge muli yetu ku tachi ja Yesu Kristu chize chakumuwahila. Uhenya wa Kristu usoloke ku miaka yeswe! Chibwe kama Chenacho.

Kushika

²² Akwetu, ngunaliumbu kuli yenu ngwami, banjikenu kanawa maliji wano akutakamisa. Mumu chasonekene yuma yinji.

²³ Ngunazange nunyingike ngwenu, mukwetu Timoteu hatuhuka mu zuwo lia lamba. Nyi weza nikawashi, mungumwanda ha kwiza nenyi jila yimuwika, muze mungwiza ni kunutala.

²⁴ Menekenu tetekeli jenu eswe ni akwa Kristu eswe. Akwetu mu chifuchi cha Italia kaananumeneka.

²⁵ Zambi anulweze yenu eswe utu wenyi.