Hebreu 12 - Mukanda Wa Zambi 1970

Zambi Tata yetu

¹ Hakutwala kuli yetu, mbunga yino yibwa haha kaali yela jetu. Kaakutujingilika, kaakumona yize twakulinga. Kashika tumbilenu mulalu weswe ni yibi yeswe yize yakutukwika. Mba tuzombokenu, tutondekezenu jila yize hanase kulutwe lietu.

² Tuhulikilenu kuli Yesu, mumu ufulielo wetu kuwakwiza kuli iye, chize ku kabutu ndoo ku songo. Yalihumikiza muze amuhachile ha kulusu. Kevwile ko sonyi ja kufwa ha kulusu, mumu yanyonga lume ha yiwape yize te yinamushimbwila. Kashika, haliabwila, kali ku chindume cha Zambi ha chitwamo cha wanangana.

³ Nyongenu chize alihumikijine hakutwala ku kole ya yivulumunyi. Kashika kanda nukokoloka, alioze likolezenu.

⁴ Mumu hakutwala ku kulitachika chenu ni yibi, niumwe mukachi kenu kanda achifwa kama.

⁵ Hinwavulama maliji a kutakamisa waze akunwaha Zambi yenu ana jenyi, nyi? “Mwanami, kanda ulelesa muze Mwene Zambi akukulamba, Kanda ulekumuka muze akukubajila.

⁶ Mumu Mwene kakufumba mweswe yoze akuzanga. Kakulamba mweswe yoze akutayiza ngwenyi: ‘Mwanami.’ ”

⁷ Lihumikizenu ni lamba ngwe lize akumwesa tata. Lamba lino linalweze chize Zambi akulinga kuli yenu ana jenyi. Kukuli umwe mwana yoze tato keshi kumwesa lamba, nyi?

⁸ Nyi Tata Zambi keshi kunulamba ngwe chize akulinga kuli ana jenyi eswe, chinalumbunuka ngwo, hi nuli ana amwenemwene ko, alioze a utanji.

⁹ Twiwulukenu atata jetu a hano hashi. Muze twabwile twanuke te kaakutulamba, hindu te twakwalemesa. Chatutamba kwononokena kuhiana Tata wa mwilu, mba mutubwa ni mwono.

¹⁰ Atata a hano hashi te kaakutulamba ha shimbu likepe muze twabwile ana ngwe chize chaawahililile. Alioze Zambi kakutulamba mumu ha yiwape yetu, hanga tukabwe akwa kulinanga ngwe iye.

¹¹ Muze Zambi akutulamba ha kutufumba, twakumona ngwe hi uwahililo ko, alioze chinyengo. Alioze kulutwe, waze haamona lamba lino, maakema mihuko ya uhwimino ku mwono wa ululi.

Kushinjila ni kutoweza

¹² Kolesenu moko jenu a ubekebeke ni makungunwa jenu a kukokoloka.

¹³ Endenu mu majila a lulama, hanga kulu lia Chilema kulichi kusengunuka, alioze likahinduke.

¹⁴ Senu tachi ni kulivwa ni atu eswe, bwenu akwa kulinanga. Nyi ka, niumwe kechi kuhasa kumona Mwene Zambi,

¹⁵ kuchina umwe mehuka utu wa Zambi. Kanyamenu kuchina umwe mabwa ngwe muji usasu uze muusoka ni muubinjisa atu anji ku kusasa chawo.

¹⁶ Kanyamenu, niumwe kanda alinga utanji chibwe kulelesa yuma ya kulinanga, ngwe Esau yoze Walanjishile chiyulo cha ukulwana wenyi kuli mwanakwo ha yakulia ya chisuho chimuwika.

¹⁷ Alioze kulutwe, nunanyingika, yazanga ngwenyi, tato amuwahise alioze Zambi yamulituna, mumu kamwene mana a kwalumuna chize alingile, chibwe yachifupa ni masoji.

¹⁸ Mumu yenu kunwejile ku Chuma chize atu maahasa kukwata ni moko, ngwe chize Aisraele ejile ku Mulundu wa Sinai kuze kwabwile kahia kaze te kanalekwoka kuhiana, ni kulaa ni milima, ni chijimbi,

¹⁹ ni liji lia chitavwi, ni liji ngwe lia kukulunguza. Muze Aisraele heevwa liji lize, yaaliumba ngwo, kanda aahanjikisa nawa,

²⁰ mumu kaahashile kulihumikiza ni Shimbi yino ngwo: “Mweswawo maheta ku mulundu, chibwe kashitu, chatamba kumushiha ni mawe.”

²¹ Usolwelo uze amwene wabwile Chuma cha woma Wahiana. Chibwe Mose iye mwene yamba ngwenyi: “Ngunachikima ni woma!”

²² Alioze yenu hinunahete ku Mulundu wa Zione ni ku limbo lia Zambi ya mwono, Yerusaleme wa mwilu, ni yizavu yalio ya tunganda a mwilu.

²³ Hinunahete ku kukunguluka cha uwahililo wa ana atangu a Zambi, waze majina jo hanaasonewa mwilu. Hinunahete kuli Zambi, ngaji ya atu eswe, nawa hinunahete ku mwiku wa akwa ululi waze haanafu, waze Zambi hanapwisa atu angunu.

²⁴ Hinunahete kuli Yesu, chitakanyishi wa Zambi ni atu a Usendo Waha. Hinunahete ku manyinga jenyi waze asapwilile, manyinga waze akulweza yuma yibema yahiana manyinga ja Abele.

²⁵ Kanyamenu, kanda nulituna yoze unahanjika. Atu waze alitunyine yoze te wakwalweza liji lia Zambi hano hashi, yaamwesa lamba. Nyi Chenacho, tunyingikenu ngwetu, nyi mutwehuka Mukwa Mwilu yoze unatuhanjikila, ni yetu makatumwesa lamba liahiana.

²⁶ Liji lienyi lianyikishine hashi ha tangwa lize, alioze haliabwila hatulakenya ngwenyi: “Mungukanyikisa nawa chisuho chikwo, hi hashi wika ko, alioze ni lilu nawa.”

²⁷ Maliji wano ngwo: “nawa chisuho chikwo” kaanalweze ngwo, yuma yize atangile makayinyikisa ni muyikatoka, hanga yize kuyahashile kunyika yikasale.

²⁸ Tusakwilenu Zambi, mumu mutukatambula Wanangana uze kuushi kunyika. Tusakwilenu Zambi ni kumuwayila ni uwayilo uze unamutela, ni vumbi ni woma,

²⁹ mumu Zambi yetu kali ngwe kahia kaze kakwonona.