Hebreu 11 - Mukanda Wa Zambi 1970

Ufulielo

¹ Ufulielo uli kunyingika pundu Chuma chize twakusa mbunge, kuuli nawa kukumuka hakutwala ku yuma yize kutushi kumona ni meso.

² Zambi yatayiza tushakulu mumu ha ufulielo wo.

³ Ku ufulielo tunanyingika ngwetu, Zambi yatanga lilu ni hashi ku liji lienyi. Kashika yuma yize yakumoneka ku meso, yabutukile ni yuma yize kuyishi kumoneka.

⁴ Ku ufulielo Abele yalambula mulambu unahiana uze wa yayo Kene. Ku ufulielo wenyi Zambi yamutayiza ngwenyi, mukwa ululi, mumu Zambi iye mwene watayijile mulambu wenyi. Ku ufulielo, Abele, chibwe hafwa kulu, hindu kakuhanjika.

⁵ Ku ufulielo Enoke kafwile ko, alioze Zambi yamuzundula kwilu. Mutu niumwe kamumwene nawa, mumu Zambi yamuzundula. Mukanda wa Zambi unambe ngwo: “Enoke, shimbu te kanda achimuzundula, te kakubemena kuli Zambi.”

⁶ Niumwe mahasa kubemena kuli Zambi, shina ni ufulielo. Mumu yoze unakundama kuli Zambi chamutamba kufuliela ngwenyi, Zambi kwali, ni kakuhana chawana kuli waze akumufupa.

⁷ Ku ufulielo Noa yevwa kutoweza cha Zambi hakutwala ku yuma yize muyikeza ho, yize kanda ayimona. Yononokena Zambi ni kutunga ulungu. Iye ni akwa zuwo lienyi yaanjila mo, ni Zambi yaalamwina. Chenacho yahisa akwa hashi eswe. Ku ufulielo nawa Zambi yamwalula mukwa ululi.

⁸ Ku ufulielo tata Abrahama yononoka muze Zambi amutambikile, yaya ku chifuchi chize Zambi amulakenyene kumwaha chihinga. Yakatuka ku chifuchi chenyi mwene, kunyingika ka kuze te anayi.

⁹ Ku ufulielo yatwama ngwe njize mu chifuchi chize amulakenyene Zambi. Te kaakubomba mu zuwo liakutunga ni makubu; ni tata Isake ni tata Yakoba nawa chizechene. Zambi yaalakenya chilakenyo chimuwika.

¹⁰ Mumu Abrahama te kakushimbwila limbo lize likwete mazuwo a fundamentu ya miaka yeswe, limbo lize Zambi afunjikile ni atungile iye mwene.

¹¹ Ku ufulielo Abrahama yahasa kusema mwana, chibwe te habwa kashinakaji, ni chibwe Sara te mumba. Yafuliela ngwenyi, Zambi makalinga chize alakenyene.

¹² Yabwa ngwe himafwa, hindu kuli iye mutu umuwika, yikusemuka atu anji ngwe matongonoshi a mwilu, ngwe masekeseke a ku mbumbulu ya kalunga lwiji waze kuwahashile kwalula.

¹³ Atu waze eswe yaafwafwa ni ufulielo. Kaatambwile ko yiwape yize aalakenyene Zambi, alioze yaayimona, yaayifuliela, muze te yichili kusuku. Yaamba ngwo: “Tuli kwetu lume yilambala ni njize hano hashi.”

¹⁴ Atu waze akwamba Chenacho, kaakulweza ngwo, kaakufupa chifuchi cho ene.

¹⁵ Nyi te kaakunenganyana hakutwala ku chifuchi chize ahichikile, kachi kwenako ahilukile.

¹⁶ Alioze kaahilukile ko, mumu te kaakwivwa usona wa kutwama mu chifuchi chibema, chize cha mwilu. Kashika Zambi keshi kwivwa sonyi muze akumuvuluka ngwo: “Zambi yetu,” mumu hanaalulikila limbo.

¹⁷ Ku ufulielo tata Abrahama yamba kulambula mwanenyi Isake ha chilumbilo, muze te Zambi amwesekele. Chibwe te Zambi halakenya Abrahama kubwa ni mwana, hindu Abrahama yamba kumulambula chibwe te kali ni umuwika lume.

¹⁸ Zambi yamulakenya ngwenyi: “Kuli Isake muukabwa ni vungu.”

¹⁹ Abrahama yanyonga ngwenyi, Zambi mahasa kuhindwisa Isake ku kufwa—chili ngwe Abrahama yatambula Isake ku kufwa.

²⁰ Ku ufulielo tata Isake yawahisa Yakoba ni Esau, yaalakenya hakutwala ku yiwape yize muyiza ho.

²¹ Ku ufulielo tata Yakoba, muze te himafwa, yawahisa mwana mweswe wa Josefe, yashachila ha lukanda wenyi nikuwayila Zambi.

²² Ku ufulielo Josefe, muze te himafwa, yahanjika hakutwala ku kutuhuka cha Aisraele mu chifuchi cha Egiptu, yaalweza chize chaatamba kulinga ni yifwaha yenyi.

²³ Ku ufulielo, muze te Mose hasemuka, yisemi jenyi yaamusweka tukweji atatu. Yaamona ngwo, kali mwana mubema, ni keevwile ko woma wa Shimbi ya mwanangana.

²⁴ Ku ufulielo Mose, muze te hakola, yalituna kulivuluka ngwenyi, mwana wa mwana pwo wa mwanangana.

²⁵ Kazangile ko, chibwe hakepe, kuwahilila mu yibi. Alioze yatongola kumona lamba hamwe ni atu ja Zambi.

²⁶ Yanyonga ngwenyi, chinalite amulelese mumu hali Chilamwina yoze Zambi alakenyene, alioze hi chibema ko kubwa pichi ni ubite wa Egiptu. Yatongola chino mumu meso jenyi te haatalikisa ku chawana cha kulutwe.

²⁷ Ku ufulielo Mose yakatuka mu chifuchi cha Egiptu. Kevwile ko woma wa mwanangana. Yanyongonona ngwe kanamono Zambi yoze te keshi kumoneka.

²⁸ Ku ufulielo yalweza Aisraele ngwenyi, chaatamba kubwa ni chiwanyino cha Kubalika; ni ha chiwanyino chize chaatamba kusapwila manyinga ku yikolo, hanga muze kanganda wa kwonona mabalika, kechi kashiha ana malunga atangu kusemuka mu zuwo ni zuwo lia Aisraele.

²⁹ Ku ufulielo Aisraele yaazauka kalunga lwiji Muchila hashi homu. Muze Aegiptu esekele kwakaula, eswe yaafwa mu meya.

³⁰ Ku ufulielo yipanga ya limbo lia Yerika yiibuzuka, muze Aisraele haajinga chipanga matangwa shimbiali.

³¹ Ku ufulielo Rahabe, chitanji, kafwile ko hamwe ni waze te keeshi kwononokena Zambi, mumu yatambula ngendeshi ja Aisraele ni sambukila.

³² Kuchi mungwamba nawa? Chishi ni ola ya kuhanjika hakutwala kuli Gideone, ni Barake, ni Samsone, ni Jefta, ni David, ni Samuel, ni akwa munanyi a Zambi.

³³ Ku ufulielo yaakumba mawanangana mu jita, yaalinga yibema, yaazuka yilakenyo ya Zambi, yaabakika makanwa ja tambwe,

³⁴ yaajima kahia kanji, yaachina muze akwa kole jo azangile kwashiha ni mikwale. Yaahongonyoka, alioze yaatakama nawa; yaalweza tachi jo mu jita; yaakumba yizavu ya tujita a yilambala.

³⁵ Ku ufulielo mapwo akwo yaamona afu jo kuhindwoka ni mwono. Atu akwo yaalituna ngwo, alilamwine, alioze yaatayiza kumona lamba ndoo ku kufwa; yaachilinga hanga ahinduke ku mwono Ubema Wahiana.

³⁶ Atu akwo yaalelesa ni kwalamba fimbo (shikote). Akwo yaakasa ni ngoji ja utale, mba yaambila mu zuwo lia lamba.

³⁷ Amwe yaashiha ni mawe, akwo yaabatwola yipinji yipinji, akwo yaashiha ni mikwale, akwo yaazala makubu a panga ni a pembe muze te akuya mu wenyi, te haabwa yiswale. Akwa kole jo yaahungumiona, yaamwesa lamba.

³⁸ Akwa hashi kaatelele ko nikutwama ni atu waze! Yaachamangina mu puya ni ha milundu, yaatwama mu yivwenge ni mu mena a hashi.

³⁹ Atu wano eswe yaabwa ni shindakenyo kuli Zambi mumu ha ufulielo wo. Alioze kaazukile ko yize Zambi alakenyene,

⁴⁰ mumu Zambi yatulakenya Chuma chibema chahiana. Kanyongene kwapwisa angunu shina ni yetu.