Hebreu 10 - Mukanda Wa Zambi 1970

¹ Shimbi ja Mose kujishi kulita lume ni ye yuma yene, alioze kujili kwajo lume yizulie ya yiwape yize muyikeza kulutwe. Atu waze akukundama kuli Zambi kujahashile kwapwisa angunu. Kuchi mujihasa kwapisa angunu, kachi akulambula milambu yizeyene mwaka ha mwaka kuyishi songo?

² Waze akuwayila Zambi ngwe chize, nyi hanaabemesa chamwenemwene ku yibi yo, kachi keechi kanenganyana nawa hakutwala ku uhiso wa milonga yo, kachi te keechi kulambula nawa milambu.

³ Kafwa ngwe, milambu yize yakwiwulula atu milonga yo mwaka ha mwaka.

⁴ Mumu manyinga ja kuji a ngombe ni pembe kaahashile kuchiza shili nichimwe.

⁵ Kashika, muze Kristu te himeza hano hashi, yamba ngwenyi: “Yena kuushi kuzanga chibwe milambu, chibwe yitapo ya tushitu. Alioze yena yiululika mujimba wami ha kuupwisa mulambu.

⁶ Kuushi kuwahilila ni milambu yize akwocha ha chilumbilo, chibwe ni milambu yize akulambula ha kuchiza shili.

⁷ Mba yingwamba ngwami: ‘Aa Zambi, yami uno, nguneza ni kulinga chize unapale, ngwe hichinasonewa mu mukanda wa Shimbi hakutwala kuli yami.’ ”

⁸ Hatangu yamba ngwenyi: “Kuushi kuzanga milambu ya manyinga ni yitapo ya tushitu waze akwocha ha yilumbilo, ni milambu yize akulambula ha kuchiza shili. Kuushi kuwahilila nayo.” Yaamba chino chibwe milambu yize kaakuyilambula nikulita ni Shimbi.

⁹ Mba yamba nawa ngwenyi: “Aa Zambi, yami uno, hineza ni kulinga chize unapale.” Chenacho Zambi hanachiza milambu yikulu yize te akulambula hatangu, mba hanasalakanyisa mo mulambu wa Kristu.

¹⁰ Yesu Kristu yalinga chize Zambi apalile. Kashika mulambu uze Yesu alambwile muze akunjikile mujimba wenyi mwene chisuho chimuwika lume, kuwachiza shili yetu.

¹¹ Tangwa ha tangwa hako mweswe kakumana ni kuvumbika ni kulambwola milambu yizeyene kanji, alioze kuyahashile kuchiza shili ya atu.

¹² Alioze Kristu yalambula mulambu chisuho chimuwika lume, ha kuchiza shili ya atu, ni mulambu uze unalite ku miaka yeswe. Mba yazezuka, yatwama ku chindume cha Zambi.

¹³ Haliabwila Kristu kanashimbwila ndoo muze mapwisa akwa kole jenyi ngwe Chuma cha kunangika molu.

¹⁴ Mumu, ku mulambu umuwika hanapwisa angunu ku miaka yeswe waze hanabemesa ku shili.

¹⁵ Mwiku wa Linanga unashindakenya nawa ngwenyi:

¹⁶ “Uno we Usendo uze mungukalikata no kulutwe lia matangwa waze. Mungukasa Shimbi jami mu mbunge jo. Mungukajisoneka mu manyonga jo. Chenacho anambe Zambi.”

¹⁷ Mba kanambe nawa ngwenyi: “Milonga yo ni ungulungulu wo chichi kayiwuluka nawa.”

¹⁸ Nyi Zambi hanakonekena kulu atu, kuheshi nawa chikuma cha kulambula mulambu ha kuchiza shili yo.

Kundamenu kuli Zambi

¹⁹ Kashika akwetu, ku kufwa cha Yesu tuli ni unjililo Muma mwa Chijila Kuhiana.

²⁰ Hanatwazulwila jila yaha ya mwono yize yabalikile ndusu mu chikalakala cha hina, chikalakala chize chili mujimba wenyi.

²¹ Tuli ni hako munene yoze wakuyula atu ja Zambi.

²² Kashika tukundamenu kuli Zambi ni mbunge yamwenemwene, ni ufulielo wa tachi, ni mbunge yakubemesa, ni mujimba wakusanyisa ni meya abema.

²³ Tukakaminyenu ku yuma yize twakusa mbunge mu longeso lietu, mumu tunahase kufuliela Zambi ngwetu, kumakalinga yize hanatulakenya.

²⁴ Tulitalenu ni akwetu ha kulitakamisa, ni kulizanga ni kulinga yitanga yibema.

²⁵ Kanda twehuka kulikungulula chetu ngwe chize akwehuka atu akwo. Alioze chatutamba kulitakamisa ni akwetu, mumu nunamono ngwenu, Tangwa lia Yesu hiliakundama.

²⁶ Mumu, nyi twanyingika kulu umwenemwene, hindu twakuvulumuna ni mbunge yeswe, kukushi nawa mulambu uze muuchiza milonga yetu.

²⁷ Chuma chatusala ko, shina kwivwa woma ha kushimbwila yize muyikeza, kafwa ngwe ubatwilo ni kahia kanji kaze mukakonona akwa kole ja Zambi!

²⁸ Mutu mweswe yoze te keshi kufunga Shimbi ja Mose te kaakumushiha, kumuvwila keke ka, nyi haamushindakenya ubi wenyi kuli yela aali hanji atatu.

²⁹ Mutu yoze wakulelesa Mwana Zambi ni kupwisa manyinga a Usendo wa Zambi aze amubemesene ngwe Chuma chamokomoko, ni kushililika Mwiku wa Linanga wa utu, Zambi kuchi makamulinga? Nyingikenu ngwenu, makamumwesa lamba liahiana.

³⁰ Mumu tunanyingika yoze wambile ngwenyi: “Yami mungukakala milonga, yami mungukafwetesa atu nikulita ni chize haanalingi.” Nawa ngwenyi: “Mwene Zambi makabatwila atu jenyi.”

³¹ Chili Chuma cha kole ni woma ha kuholokela mu moko ja Zambi ya mwono!

³² Iwulukenu chize nwabwile mwaka wali. Ha matangwa waze, muze te Pangu lia Zambi hilianutemwisa, nwamwene lamba linji, hindu yinumana nguu mu kulitachika chize.

³³ Yisuho yikwo te kaakunushililika ni kunuhungumiona ku meso ja atu. Yisuho yikwo nwalulikile kubwa hamwe ni waze te akumona lamba.

³⁴ Yinuvwila funge keke mu zuwo lia lamba, ni muze te atu akunwiya yuma yenu, yinwaatayiza ni uwahililo ngwenu, aye nayo, mumu te nunanyingika ngwenu, nuli ni ubite Wahiana uze wakulinduluka.

³⁵ Kashika kanda nutokesa hamu lienu, mumu chawana chinene likwete.

³⁶ Chanutamba kulihumikiza ni kulinga chize Zambi anapale ni kutambula yize Zambi hananulakenya.

³⁷ Mumu Mukanda wa Zambi unambe ngwo: “Ha shimbu likepe yoze chatamba kwiza kumeza, kechi kushimbula.

³⁸ Hindu mukwa ululi wami mabwa ni mwono ku ufulielo. Alioze, nyi mahiluka nawa kunyima, chichi kuwahilila nenyi.”

³⁹ Yetu kutushi ngwe waze akuhiluka kunyima ni kutokesa ufulielo wo. Alioze twakufuliela, ni Zambi kakutulamwina.