Hebreu 1 - Mukanda Wa Zambi 1970

Yesu Kristu kali Usolwelo Wahiana wa Zambi

¹ Ha shakulu Zambi yahanjeka ni akwa munanyi jenyi kuli tushakulu twetu. Yachilinga yisuho yinji ni ndako jeka ni jeka.

² Alioze, ha matangwa wano akusula, Zambi yahanjika muli Mwanenyi. Zambi hanatange yuma yeswe ni kwoko lia Mwanenyi, hanamutongola nawa mu kuhinga yuma yeswe ha tangwa liakusula.

³ Mwe Mwana kanatemuka ni kubeyima cha uhenya wa Zambi. Kulifwa chenyi chili lume pundu ngwe chize abwa Zambi. Mwanenyi kakwata yuma yeswe ku tachi ja liji lienyi. Muze habemesa atu ku shili yo, yatwama ha chitwamo cha Wanangana mwilu ku chindume cha Zambi, Mukwa Ndundo Jeswe.

Mwana Zambi kanahiana tunganda a mwilu

⁴ Jina lize Zambi alukile Mwanenyi linahiana majina a tunganda a mwilu. Chimuwika nawa, Mwana iye mwene kanahiana tunganda a mwilu.

⁵ Mumu Zambi kanda ambila kama umwe kanganda ka mwilu ngwenyi: “Yena uli Mwanami. Hinakusema musono uno.” Chibwe kanda ambila kama umwe kanganda ka mwilu ngwenyi: “Mungukabwa Tato, neye makabwa Mwanami.”

⁶ Muze te Zambi himamba kutuma Mwanenyi mutangu hano hashi, yamba nawa ngwenyi: “Tunganda a mwilu eswe amuwayile.”

⁷ Hakutwala kuli tunganda a mwilu Zambi hanambe ngwenyi: “Nakupwisa tunganda twami ngwe fuji, ni tuvumbi twami ngwe milengi ya kahia.”

⁸ Alioze hakutwala kuli Mwanenyi Zambi hanambe ngwenyi: “Zambi, chitwamo che cha Wanangana muchilinduluka ku miaka yeswe ni miaka yeswe! Wakuyula Wanangana we ni ululi.

⁹ Wakuzanga umwenemwene, wakuvutwokela ungulungulu. Kashika Zambi, Zambi ye, hanakutongola ni kukuwahilisa ni lufuma Wahiana yoze wa akwenu.”

¹⁰ Zambi hanambe nawa ngwenyi: “Mwene, ha Ubutukilo yena watangile hashi, yena nawa watangile lilu ni moko ja yena mwene.

¹¹ Yuma yino yeswe muyikahwa, alioze yena muukalinduluka. Yeswe muyikalumuka ngwe yibuzu.

¹² Muukayivunga ngwe mahina, muyikalumuka ngwe yibuzu. Alioze yena cheswe ubwa chizechene, mwono we kuuchi kahwa.”

¹³ Zambi kanda ambila kama umwe wa kuli tunganda twenyi a mwilu ngwenyi: “Twama ku chindume chami, ndoo ni muze mungukasa akwa kole je ngwe Chuma cha kunangika yiliato ye.”

¹⁴ E tunganda a mwilu aya? Eswe kaali mwiku uze wakulingila Zambi, uze Zambi akutuma ha kukwasa waze maazuka ulamwino.