Hagai 2 - Mukanda Wa Zambi 1970

Uhenya wa zuwo liaha lia Zambi

¹ Ha tangwa makumi aali ni kashi lia kakweji wa muchishimbiali ha mwaka uzewene, mukwa munanyi wa Zambi Hagai yahanjika nawa nikulita ni liji lia Mwene Zambi.

² Zambi yamulweza ahanjike kuli Zerubabele mukwa kuyula wa Yuda, ni Yoshua mwata wa mahako ja Zambi, ni kuli atu eswe ngwenyi:

³ “Kukuli umwe mutu yoze unewuluka uhenya wa zuwo litangu lia Zambi, nyi? Ngwe kuchi zuwo lino liaha linasoloka kuli yenu? Linasoloka lume ngwe Chuma chamokomoko kuli yenu.

⁴ Alioze kanda nulekumuka, yenu eswe. Hondanganenu milimo, mumu yami nguli hamwe ni yenu.

⁵ Muze nwatuhukile mu chifuchi cha Egiptu, nanulakenyene ngwami, mungubwa hamwe ni yenu matangwa eswe. Nguli hamwe ni yenu ndoo ni musono, kashika kanda nwivwa woma.

⁶ “Shimbu likepe mungunyikisa lilu ni hashi, mavu ni kalunga lwiji.

⁷ Mungukumba mavungu eswe, ni ubite wo maauneha kuno, mba zuwo liami mulizala ni ubite.

⁸ Prata ni oru yeswe hashi hano yili niyami.

⁹ Zuwo liami liaha mulibwa ni uhenya kuhiana lize likulu. Mwenamo munguyukishila atu jami ni kwaaha uhwimino.” Mwene Zambi Mukwa Ndundo Jeswe hachamba.

Mukwa munanyi yalongesa mahako

¹⁰ Ha tangwa makumi aali ni lia muchiwana lia kakweji wa muchilivwa ha mwaka wa muchaali wa kuyula cha mwanangana Dariuse, Mwene Zambi Mukwa Ndundo Jeswe yahanjika nawa kuli mukwa munanyi Hagai.

¹¹ Ngwenyi: “Hula mahako hanga akumbulule ku chihula chino, ngwami,

¹² nyi umwe mutu mambachila yifwo ya chijila ya ku milambu mu hina lienyi, mba ni zeze ja hina lienyi hijasunga ku mbolo, hanji ku yakulia ya kuteleka, chibwe ku maji ja olive, hanji ku yakulia yeswayo, ye yuma yize muyibwa nawa ya chijila, nyi?” E mahako yaakumbulula ngwo: “Kaa mala!”

¹³ Mba Hagai yaahula nawa ngwenyi: “Nyi ngwe mutu halichisa muze hakwata ku mujimba wa mufu, mba susumuku hakwata ku Chuma cha chijila, Chuma chize muchibwa cha luchisa, nyi?” No yaamukumbulula ngwo: “Ewa muchibwa cha luchisa.”

¹⁴ Mba Hagai yamba ngwenyi: “Mwene Zambi kanambe ngwenyi: ‘Chenacho abwa atu a ku vungu lino; ni ye mihuko ya ku minda yo, ni ye milambu yize akulambula yili ya luchisa.’ ”

Mwene Zambi yalakenya kuwahisa atu jenyi

¹⁵ Mwene Zambi kanambe ngwenyi: “Kunushi kumona yuma yize hiyabwa kuli yenu, nyi? Shimbu te kanda nubutuka kutungulula zuwo liami,

¹⁶ nwakuya ku yimwe mbuto yakulumbika hashi ni kunyonga ngwenu, munuwana kulema cha mbuto kilo 200, alioze nwakuwana ko shina 100. Te nwakuya ni kuswita vinyu litro 100 mu chimwe chikashi chinene, alioze nwakuwana lume 40.

¹⁷ Nanutuminyine fuji ya kahia ni chiwe yikafwite yuma yeswe yize nwatumbile, hindu kunwalumukine ku mbunge.

¹⁸ Musono lili tangwa lia makumi aali ni lia muchiwana lia kakweji wa muchilivwa, lienalio nwamanununa fundamentu ya zuwo liami. Talenu chize muchibwa!

¹⁹ Chibwe kukwasalile mbuto niyimwe, chibwe yichakata ya vinyu, ni mitondo ya mikuyu, ni mihuko ya grenade, ni mitondo ya olive kanda yichima mihuko, hindu mungunuwahisa.”

Chilakenyo cha Mwene Zambi kuli Zerubabele

²⁰ Ha lie tangwa lize lia makumi aali ni lia muchiwana lia kakweji, Mwene Zambi yalweza Hagai longeso lia muchaali

²¹ mumu hali Zerubabele mukwa kuyula wa Yuda ngwenyi: “Ngunambe kunyikisa lilu ni hashi,

²² ni kukumba mawanangana ni kusulisa tachi jo. Mungufwenya matemba jo ni waze akwendela ho; tuvwalu kumaafwa, ni waze akwenda ho kumaalishiha ene ni ene.

²³ Ha tangwa lize mungwanda yena Zerubabele, kavumbi kami, mungukuwahisa ha kuyula mu jina liami, mumu yena uli yoze natongwele.” Mwene Zambi Mukwa Ndundo Jeswe hachamba.