Hagai 1 - Mukanda Wa Zambi 1970

Mwene Zambi yaaha Shimbi ya kutungulula zuwo lia Zambi

¹ Ha mwaka wa muchaali wa kuyula cha Dariuse mwanangana wa Persia, ha tangwa litangu lia kakweji wa muchisambano, mukwa munanyi wa Zambi Hagai yalongesa atu nikulita ni liji lia Mwene Zambi. Lie liji liabwile mumu hali mukwa kuyula wa Yuda, Zerubabele mwana wa Shaltiele, ni mumu hali mwata wa mahako ja Zambi, Yoshua mwana wa Jehozadeke.

² Mwene Zambi Mukwa Ndundo Jeswe yambila Hagai ngwenyi: “Atu wano kaanambe ngwo, uno hi mwaka Ubema ko wa kutungulula zuwo lia Zambi.”

³ Hohene mwe mukwa munanyi, nikulita ni liji lia Mwene Zambi, yambila atu ngwenyi:

⁴ “Ayenu atu jami, mumu yika nwakutwama mu mazuwo abema, alioze zuwo liami linabuzuka chichize?

⁵ Nyongenu ha mwono wenu.

⁶ Hinwalima mbuto yinji, alioze hinwabatula yikepe wika. Nuli ni yakulia, alioze kuyahashile kunukuchisa. Nuli ni vinyu ya kunwa, alioze pwila kuyichi kuhwa! Nuli ni mahina, hindu nunevu chishika.

⁷ Kuma kunusolo kumona mumu yika yuma yize yinabu, nyi?

⁸ Hikandukenu ku milundu, nubatule yishimi, nutungulule zuwo lia Zambi; mba ngwivwe kuwaha hanga nunguwayile ngwe chize chinalite.

⁹ “Nwasele mbunge ha kubatula mbuto yinji, alioze yiyalumuka yikepe. Ni muze nwambachile mbuto ku mazuwo jenu, yami yinguyifujila kweka. Mumu yika nalingile chino? Mumu zuwo liami lili liakwenyeka, alioze mukachi kenu mutu ni mutu kakululika shina zuwo lienyi mwene.

¹⁰ Kashika vula kasolo kunoka ni Chuma nichimwe chinatatuka.

¹¹ Hinaneha changa ha chifuchi: ha milundu, ni mu minda ya mbuto, ni mu minda ya vinyu, ni ha mitondo ya olive, ni ha mbuto yeswe yize yakwima hashi. Atu ni tushitu no maabwa ni changa. Yuma yeswe yize nunanyongo kutumba neyo kuyichi kutatuka.”

Atu yoononoka ku Shimbi ja Mwene Zambi

¹² Hohene Zerubabele, ni Yoshua, ni atu eswe waze akatukile mu undungo mu chifuchi cha Babilonia, yaalinga yeswe yize Mwene Zambi aalwezele kulinga. Yeevwa woma, yoononoka ku liji lia mukwa munanyi Hagai, kanganda ka Mwene Zambi.

¹³ Mba Hagai yalweza atu liji lia Mwene Zambi ngwenyi: “Mungubwa hamwe nenu, chino che chilakenyo chami.”

¹⁴ Mwene Zambi yakolesa atu eswe kululika zuwo lia Zambi: Zerubabele mukwa kuyula wa Yuda, ni Yoshua mwata wa mahako ja Zambi, ni eswe waze akatukile mu undungo. Yaabutuka kululika zuwo lia Mwene Zambi Mukwa Ndundo Jeswe, Zambi yo,

¹⁵ ha tangwa makumi aali ni lia muchiwana lia kakweji wa muchisambano wa mwaka wa muchaali wa kuyula cha mwanangana Dariuse.