Habakuke 3 - Mukanda Wa Zambi 1970

Habakuke yalemba Mwene Zambi

¹ Chino che kulemba cha mukwa munanyi Habakuke:

² Aa Mwene Zambi, hingunevu lufuma we; nakulishimwoka. Haliabwila ha matangwa jetu linga nawa yitanga yinene yize te wakulinga ku shakulu. Tuvwile kama keke, chibwe muze Unevu ufwatulo.

³ Zambi kanakatuka ku Edome, Zambi munangi kanakatuka ku milundu ya Parane. Lilu hazala ni uhenya wenyi, hashi hazala ni uhaliso wenyi.

⁴ Kaneza ni uhenya wa njaji, ni mitemite ku kwoko lienyi, ku kwoko lienyi lia ndundo.

⁵ Kakutuma misongo kulutwe lienyi, kakwambila kufwa chimukaule.

⁶ Muze anamana, hashi muhanyika; muze anatale, mavungu maachikima. Milundu ya miaka yeswe yinabuzuka, mindundena ya mutolo yinashikiwa, mindundena haze te akwendela ku shakulu.

⁷ Namwene ngwami, akwa Kushane woma anevu, akwa Midiane kaanachikima.

⁸ Aa Mwene Zambi, je njiji je jakuvwishile ufwatulo, nyi? Kafwa mwe kalunga lwiji mwe wakuvwishile toto, nyi? Hiunendangana ha malelwa; kangonga yabwa temba lie, muze wakwashile atu je kukumba.

⁹ Yiululika kulu uta we, yiululika ha kwasa mivwi ye. Njaji ye yabulika hashi.

¹⁰ Muze milundu yakumwene, yiichikima; meya a mwilu yaamwanganyina hashi. Meya a kushi lia hashi yaapukumuka ni lundunjila, miavu yo yiivwelwoka kuhiana.

¹¹ Ha kubeyima cha mivwi ye muze te yinende ni mitemite ya kunga lie, tangwa ni kakweji yiimana kikilii.

¹² Yena wendanganyine hashi heswe ni ufwatulo; mu utenu we yiuliata mavungu.

¹³ Hiwatuhuka ha kulamwina atu je, ha kulamwina mwanangana yoze watongwele. Hiwanungwina hashi mukwa lutwe wa yingulungulu, hiwonona atu waze te akumukaula.

¹⁴ Mivwi ye hiyinatuwu mukwa lutwe wa tujita twenyi, muze ejile ngwe kangonga ha kutumwanga ni kuseha ngwe waze akubinjisa yiswale ku tenga.

¹⁵ Yiuliata ha kalunga lwiji ni tuvwalu twe, meya a ndundo yaapukumuka.

¹⁶ Ngunevu yize yeswe ni kuchikima; mivumbo yami yinachikima ni woma. Mujimba wami hiwahongonoka, molu jami kaanabengwoka. Mungulihumikiza ni kutwaminyina tangwa lize Zambi makamwesa lamba waze akulimika ni yetu.

¹⁷ Chibwe mitondo mikuyu ni vinyu ni olive yinafulwa mihuko, ni mu minda kumusolo kwima mbuto, chibwe mapanga eswe kaanafu, ni matanga a ngombe kaali awashi,

¹⁸ hindu mungwivwa chiseke, munguwahilila, mumu Mwene Zambi kali chilamwina chami.

¹⁹ Mwene Zambi kakungutakamisa. Kakushindakenya molu jami ngwe a kai, ni kungufunga kanawa ha milundu.