Habakuke 2 - Mukanda Wa Zambi 1970

Mwene Zambi yakumbulula Habakuke

¹ Mungukanduka ha zuwo liami lisuku, mungushimbwila kumona chize Mwene Zambi mangwamba chize Changutamba kulweza atu, ni kumbululo lize mangwaha ku kunenganyana chami.

² Mba Mwene Zambi yangukumbulula ngwenyi: “Usolwelo uze hinakulweza usoneke ha tujolo (briki) ya mavu, mba hanga ahase kuutanga kanawa.

³ Usoneke, mumu tangwa lia kumanunuka chawo kanda lichiheta. Alioze tangwa lineza nikawashi. Yeswe yize ngunakulweze muyimanunuka. Muumona ngwe kuyichi kwiza nikawashi, chibwe chocho ushimbwila. Chamwenemwene kumuyikabwa, kuyichi kashimbula.

⁴ Lweza atu maliji wano ngwe: ‘Yingulungulu keechi kalinduluka, ni mwono, alioze akwa ululi kumaabwa ni mwono mumu kaakushachila hali Zambi.’ ”

Mwene Zambi mamwesa yingulungulu lamba

⁵ Ubite kuwakwonga atu. Akwa lwahu wa mbongo kaakulengumuka, kaali ngwe muma lia afu muze kumushi kukuta nichimwe, keeshi ni uhwimino. Kashika kaakukumba vungu ni vungu mumu hali ayo ene.

⁶ Ababilonia maakaalelesa kuli waze haakumba. Maakamba ngwo: “Nwakwanda yize hi niyenu ko, alioze lamba lienu! Ndoo tangwa lika munulibichisa ha kuketeka akwa makongo jenu?”

⁷ Atu akwo waze anukwete makongo keechi kunuketeka nikwafweta susumuku, nyi?

⁸ Hinunabubu mavungu anji, alioze waze haasala kumaakanububa mumu hali atu waze nwashihile mu upupilo wenu kuli akwa hashi ni membo jo.

⁹ Lamba lienu! Hinunabichisa akwa majiko jenu ni ubite uze nwatambwile ni tachi, hinuneseka kufunga kanawa akwa majiko jenu ku utoji.

¹⁰ Alioze yitanga yenu hiyinakokela akwa majiko jenu sonyi. Ha kwonona mavungu anji, hinunalilimuna yenwene.

¹¹ Chibwe mawe ni mikambo kuyakukololoka ha kulimika ni yenu.

¹² Lamba lienu! Yenu nwatungile limwe limbo ni uhenge, mba yinulikolesa ni kushiha atu.

¹³ Mavungu waze nwakumbile, milimo yamokomoko ahondanganyine. Yuma yeswe yize atungile, yinaweme upu. Mwene Zambi Mukwa Ndundo Jeswe mwe hachilinga.

¹⁴ Hashi heswe muhakazala ni mana a uhenya wa Mwene Zambi, ngwe chize tulunga lwiji akuzala ni meya.

¹⁵ Lamba lienu! Mumu mu ufwatulo wenu nwakolesele enyembo jenu sonyi, yinwaabebiekesa ngwe waze haazenga walwa.

¹⁶ Yenu nawa maanukolesa sonyi, keechi kunulemesa. Yenu nawa mununwa, maanubebieka. Mwene Zambi manunwisa musenge wa yenwene wa lamba, mba vumbi lienu mulialumuka sonyi.

¹⁷ Hinunanungwina usaki wa Libano hashi, ni yenu nawa maanunungwina hashi. Hinunashihi tushitu twamo, tushitu no maanuvwisa mwongo. Yuma yino muyibwa mumu hali atu waze nwashihile ni mumu ha upupilo wenu kuli akwa hashi ni membo jo.

¹⁸ Mwe hamba kukwasa chenyi chika? Chili lume Chuma chize atangile mutu. Kahashile kunulweza umwenemwene, shina mahuza wika. Mba mumu yika kushachila hali zambi wakulinga ni moko, yoze keshi kuhanjika?

¹⁹ Lamba lienu! Mumu nwakwambila Chipinji cha mutondo ngwenu: “Hinduka!” Hanji ku liwe ngwenu: “Katuka!” Kuma mahamba mahasa kunulweza Usolwelo, nyi? Kali kwenyi Chuma chakulamika prata ni oru, alioze muli iye kumushi mwono.

²⁰ Mwene Zambi kali mu zuwo lienyi lia chijila; akwa hashi eswe ahole kuluu ku meso jenyi.