Habakuke 1 - Mukanda Wa Zambi 1970

¹ Mwene Zambi yasolola maliji wano kuli mukwa munanyi Habakuke.

Habakuke yanenganyana mumu ha uhenge wa atu

² Aa Mwene Zambi, yisuho yingahi Changutamba kutambika mba hanga ungukwase, kuma kuusolo kungwivwa, nyi?

³ Mumu yika unangumwesa lamba libwahaha? Ngwe kuchi muuhasa kulihumikiza ni uhenge ubwahaha? Kwenyeka ni kwonona yinangujingilika, kutachika ni kuzwela yiliko sali ni sali.

⁴ Shimbi hijalela, jili jamokomoko, niumwe keshi kubatula kanawa, ululi kuushiko. Yingulungulu kaakubinjisa akwa ululi, ngaji kaakubatwila ni uhenge.

Kumbululo lia Mwene Zambi

⁵ Mba Mwene Zambi yambila atu jenyi ngwenyi: “Talenu kanawa mavungu waze ananujingilika, mba munulishimwoka ha chize munumona. Mungulinga chimwe Chuma chize kunuchikufuliela muze munuchivwa.

⁶ Ngunavundula Ababilonia anuyule, atu asasu kanda akwa kulipupula. Kaakwenda hashi heswe akumbe yifuchi yeka ni yeka.

⁷ Kaakukolesa woma ni mwongo, mu kulengumuka cho kaakulinga cheswacho akuzanga.

⁸ “Tuvwalu two kaakwete tambu ngwe kolwama, kaali asasu ngwe tungunga waze haanama ni zala. Atu jo waze akwenda ha tuvwalu kaakukatuka ku chifuchi kusuku, kaakuzomboka fuji, kaakuhulumuka ngwe tela waze akukwata tushitu two.

⁹ “Tujita two kaakuya kulutwe ni uswii akumbe atu eswe, kaakuvwisa mwongo muze akukundama. Funge jo hooka ngwe masekeseke.

¹⁰ Kaakulelesa mianangana ni kuseha akwa lutwe. Membo akukoleka keeshi kwakwika nichimwe, kaakulumbika ko mavu ha kwakumba.

¹¹ Mba maabalika ko ngwe fuji, atu wano tachi jo jili ngwe zambi yo.”

Habakuke yanenganyana nawa kuli Mwene Zambi

¹² Aa Mwene Zambi, chize ku kabutu yena uli Zambi. Yena uli Zambi yami, munangi kanda wa miaka yeswe. Mwene Zambi, Zambi yami, kanda Luliwe lwami lwa kuswama, hiunatongola Ababilonia, hiwaapwisa akwa tachi hanga atumwese lamba.

¹³ Alioze ngwe kuchi muuhasa kulihumikiza chichize ni yiswii wano? Meso je kaali a chijila kuhiana ha kutala yibi, kuwahashile kulihumikiza ni atu waze akulinga yibi. Kuchi mba unalihulika nee muze wano anonwona akwa ululi kuhiana ayo?

¹⁴ Ngwe kuchi muuhasa kupwisa atu ngwe yishi hanji ngwe mbunga ya tututu waze keeshi mukwa kwayula?

¹⁵ Ababilonia kaakukwata atu ngwe chize mayanga a yishi akukwata yishi. Kaakwakoka mu Wanda ni kukololoka ni uwahililo.

¹⁶ Kaakuwayila manda jo ni kwalambula milambu, mumu manda jo e akwamwesa yuma yeswe yibema.

¹⁷ Kuma kumaakahinga ni mikwale yo matangwa eswe ni kubatwola mavungu chichize ni keke kama ka, nyi?