Galashia 6 - Mukanda Wa Zambi 1970

Likwasenu kulimbachila yilemu

¹ Akwetu, nyi umwe hatalinga mu chimwe chitela, yenu waze nuli ni tachi mu ufulielo muhilwisenu mu jila ya ululi. Alioze Chilinge ni mbunge ya kushimbika. Kanyama yena mwene, kuchina ni yena nawa Sakwonga makweseka.

² Likwasenu kulimbachila yilemu. Chenacho munumanununa Shimbi ja Kristu.

³ Nyi umwe kakulinyonga ngwenyi, nguli mulemu, alioze kuma kali mutu wamokomoko, kakuhonga iye mwene.

⁴ Mutu mweswe alieseke iye mwene. Nyi chinalite, mahasa kuwahilila ni yize halinga iye mwene, hi kulieseka ko ni yitanga ya akwo.

⁵ Mumu mutu mweswe chamutamba kumbata yilemu yenyi mwene.

⁶ Mutu yoze unalilongesa Sango Jibema, chamutamba kulianyina yuma yeswe yibema yize ali nayo ni longeshi yenyi.

⁷ Kanda nulionga yenwene, niumwe mahasa kulenya Zambi, mumu cheswacho mutu matumba, Chenacho nawa makahela.

⁸ Nyi matumba nikulita ni usolo ubi wa uutu, ku usolo wenyi ubi makahela mihuko ya kufwa. Alioze, nyi matumba nikulita ni Mwiku wa Linanga, ku Mwiku makahela mihuko ya mwono wa miaka yeswe.

⁹ Kanda tukokoloka ha kulinga kanawa, mumu tangwa mulikeza lize mutukahela mihuko, nyi kutwakokolokele.

¹⁰ Ha chino, shimbu tuchili ni mwaka, tulingenu yibema kuli eswe, alioze kuhiana kuli akwetu akwa kufuliela.

Kushika ni kumeneka

¹¹ Talenu sona jinene jibwa haha ngunasoneka haliabwila ni kwoko lia yami mwene!

¹² Waze akulisuta ni kulisamba ha yuma ya haze lia mujimba, enoo akuzanga kunushinjila ha kunupwisa ngalami. Alioze kaakuchilinga lume kuchina maamona yihungumiona hakutwala ku kulusu ya Kristu.

¹³ Atu waze akupwisa akwo ngalami, ayo ene keeshi kufunga Shimbi, alioze kaakuzanga anupwise ngalami hanga ahase kulisamba ngwo, hinwatayiza ku Shimbi yize.

¹⁴ Alioze yami chahashile kulisamba shina hakutwala ku kulusu ya Mwene Yesu Kristu. Mumu ku tachi ja kulusu yenyi ndako yibi ya hashi hiyinafu kulu hakutwala kuli yami, ni yami hingunafu hakutwala ku ndako yibi ya hashi.

¹⁵ Kubwa ngalami hanji chilima hi Chuma ko. Chuma chinene ngwami, kubwa mutu mwaha.

¹⁶ Waze moononoka ku longeso lino, ni Aisraele eswe a Zambi, Zambi aahe uhwimino ni kweevwila keke!

¹⁷ Hakusula ngwami, mutu niumwe kanda angubinjisa nawa, mumu yimbambili yize nguli nayo ha mujimba wami, yinalweze ngwo, nguli ndungo ya Yesu.

¹⁸ Mwene wetu Yesu Kristu anulweze utu yenu akwetu eswe. Chibwe kama Chenacho.