Galashia 5 - Mukanda Wa Zambi 1970

Kanda nutokesa utuswilo wenu

¹ Kristu hanatutusula hanga tubwe akwa kutusuka amwenemwene. Manenu nguu mu utuswilo uno. Kanda nutayiza kubwa nawa ndungo.

² Banjikenu! Yami Paulu ngunanwambe ngwami, nyi munulipwisa ngalami, kuli Kristu kunuchi kufumbula nichimwe.

³ Ngunashindakenya nawa ngwami, mutu mweswe yoze malipwisa ngalami, chamutamba kumanununa Shimbi jeswe.

⁴ Yenu, waze nwakufupa kubwa akwa ululi ha kwononokena Shimbi, hinwalihandununa ni Kristu. Hinwalichiza ku utu wa Zambi.

⁵ Alioze yetu twakusa mbunge ngwetu, Zambi matupwisa akwa ululi. Chenacho twakushimbwila ku tachi ja Mwiku wa Linanga, Mwiku uze wakutukwasa mumu ha ufulielo wetu.

⁶ Mumu muze hitunalinungu kulu ni Kristu, kubwa ngalami hanji chilima hi Chuma ko. Chuma chinene ufulielo uze wakulinga ni zango.

⁷ Nwazombokele kanawa! Iya wanukwikile ha kwononokena umwenemwene?

⁸ Kukununa chino hi cha kuli Zambi ko, yoze wakunutambika?

⁹ Ngwe chize akwamba ngwo: “Yitumbo yikepe muyifutunwisa mwaha weswe.”

¹⁰ Alioze ngunafuliela ngwami, mumu ha kulinunga chetu ni Mwene, kunuchi kubwa ni manyonga alisa ni waze nguli no. Alioze yoze wakunubinjisa, cheswe abwa, Zambi makamumwesa lamba.

¹¹ Alioze, akwetu, nyi yami nakwambujola ngwami, Ungalami Chuma chilemu, kuchi mba akunguhungumiona ndoo musono? Nyi che nakulinga, kumana liji lize nakwambujola hakutwala ku kulusu lia Kristu kulichi kubwa chitalingiso kuli mutu niumwe.

¹² Ngunazange ngwami, waze akunubinjisa aye lume kusuku ni milimo yo, alitungune ayo ene!

¹³ Yenu, akwetu, Zambi hananutambika ha kubwa akwa kutusuka. Alioze kanda nutayiza usolo ubi wa uutu kunuyula mumu ha utuswilo uno. Shinoho lilingilenu ni zango.

¹⁴ Mumu Shimbi jeswe jinamanunuka mu liji lino ngwo: “Zanga mwenyembo we ngwe chize wakulizanga yena mwene.”

¹⁵ Alioze, nyi munulinga ngwe tushitu a mu yambu ni kulisuma ni kulilemeka yenwene, talenu kanawa, nyi ka, munulinongesa yenwene.

Mihuko ya Mwiku wa Linanga ni yitanga yibi ya uutu

¹⁶ Ngunanwambe chino ngwami, tayizenu Mwiku wa Linanga kuyula mwono wenu, kanda numanununa usolo ubi wa uutu.

¹⁷ Mumu usolo ubi wa uutu wetu kuwakulimika ni upale wa Mwiku wa Linanga, ni upale wa Mwiku wa Linanga kuwakulimika ni usolo ubi wa uutu. Mwiku wa Linanga ni usolo wa uutu kuyakulitachika. Ha chikuma chino kunwahashile kulinga Chuma chize nunazange.

¹⁸ Nyi Mwiku wa Linanga wakunusongwela, kunushi nawa mu chiyulo cha Shimbi.

¹⁹ Yitanga ya usolo ubi wa uutu yinasoloka zwalala, yenayo yino: utanji ni waze ali ku malu, ni utanji ni twamishi, ni luchisa,

²⁰ ni kukombelela mahamba, ni kupanda wanga, ni kole, ni Vunda, ni ukwa, ni ufwatulo, ni kulilamba ha bambo, ni kulihandununa;

²¹ ni lufwachinda, ni kuzengewa, ni kuhungumuka ni yibi ku yiteleka, ni yuma yikwo ngwe yino. Ngunanutoweza haliabwila ngwe chize nambile kulu ngwami, atu waze akulinga yuma yino keechi kanjila mu Wanangana wa Zambi.

²² Alioze mihuko ya Mwiku wa Linanga yenayo yino: zango, ni uwahililo, ni uhwimino, ni kusuula, ni utu, ni ubeme, ni kushishika,

²³ ni uhomboloji, ni kulihumikiza. Shimbi kujishi kulimika ni yuma ngwe yino.

²⁴ Akwa Kristu haanashiha usolo Ubi ni kuzanga chibi cha uutu wo.

²⁵ Mwiku wa Linanga hiunatwehe mwono. Chatamba nawa kuyula mwono wetu.

²⁶ Kanda tubwa akwa kulengumuka, hanji kulivwila ukwa, hanji kulihia.