Galashia 4 - Mukanda Wa Zambi 1970

¹ Maliji akwo ngunambe nawa ngwami, swana yoze makahinga yikumba ya tato kali ngwe ndungo ha shimbu lize achili kanuke chibwe kali mwenyaho.

² Muze achili kanuke kali mu chiyulo cha tufufuchi ni ndeji ndoo ku tangwa lize atongwele tato.

³ Ni yetu chizechene twabwile mu chiyulo cha mwiku wa hano hashi muze twabwile twanuke.

⁴ Alioze muze tangwa lize atongwele hiliaheta, Zambi yatuma Mwanenyi. Yasemuka kuli umwe pwo, mu chiyulo cha Shimbi ja Ayuda,

⁵ hanga akakule waze ali mu chiyulo cha Shimbi, hanga tuhase kubwa ana ja Zambi.

⁶ Ha kushindakenya chize nuli ana jenyi, Zambi hanatumu Mwiku wa Mwanenyi mu mbunge jetu, uze wakutambika ngwenyi: “Tata, Tata yami.”

⁷ Nyi chocho, hi uli ndungo nawa ko, alioze mwana wa Zambi. Nyi uli mwanenyi, uli swana nawa ku upale wa Zambi.

Chinyengo cha Paulu mumu hali akwa Galashia

⁸ Ha miaka yikulu te kunwanyingikine Zambi, ni nwabwile ndungo ja mazambi waze hi amwenemwene ko.

⁹ Alioze haliabwila nunanyingika Zambi—hanji shinoho Zambi kananunyingika—ngwe kuchi nunazange kuhiluka kuli mwiku wamokomoko, uze kuushi tachi? Kuchi kevwe nunazange kubwa nawa ndungo jawo?

¹⁰ Nwakulemesa matangwa amwe, ni tukweji amwe, ni mashimbu amwe, ni yanga yimwe, ni miaka yimwe!

¹¹ Ngunanuvwila woma, kuchina milimo yize nahondanganyine hakachi kenu muyibwa yamokomoko.

¹² Akwetu, ngunaliumbu kuli yenu ngwami, bwenu ngwe yami, mumu yami nawa nguli ngwe yenu. Kunwangulingile chibi nichimwe.

¹³ Nunewuluka ngwenu, mumu ha yikola yami nambujolele Sango Jibema kuli yenu chisuho chitangu.

¹⁴ Kunwangulelesele, kunwalitunyine yami, chibwe yikola yami yinakabwa ngwe cheseko kuli yenu. Hindu nwangutambwile ngwe kanganda ka Zambi, hanji ngwe chize te munutambula Yesu Kristu mwene.

¹⁵ Nwawahililile! Yika mba yanuwanyine? Ngunahase kushindakenya hakutwala kuli yenu ngwami, nyi chabwile chashi, kachi nwatombongwene meso jenu ni kungwaha o!

¹⁶ Kuchi, haliabwila hinalumuka mukwa kole ha kunwambulwila umwenemwene, nyi?

¹⁷ Atu waze kaanase tachi ha kunukoka, alioze manyonga jo hi abema ko. Kaakuzanga lume kunuhandununa ni yami, hanga nukaule longeso lio.

¹⁸ Chinabeme kusa tachi ku yuma yibema matangwa eswe, hi wika ko muze nguli hakachi kenu.

¹⁹ Ana jami? Ngunevu yikola cheka nawa hakutwala kuli yenu ngwe pwo yoze unaseme, ndoo muze ndako ya Kristu muyisoloka muli yenu.

²⁰ Ngunazange kubwa hamwe ni yenu haliabwila, hanga nguhase kwalumuna maliji jami, mumu ngunanenganyana kuhiana hakutwala kuli yenu.

Chishima cha Hagare ni Sara

²¹ Ngwambulwilenu, yenu waze nwakuzanga kubwa mu chiyulo cha Shimbi, kunushi kwivwa chize Shimbi jinambe, nyi?

²² Hijinasonewa ngwo, Abrahama yabwa ni ana malunga aali, umuwika wa kuli ndungo, mukwo wa kuli mwenyaho.

²³ Alioze mwana lunga yoze asemene ni ndungo yasemuka nikulita ni ndako ya uutu. Ni mwana lunga yoze asemene ni mwenyaho yasemuka nikulita ni chilakenyo cha Zambi.

²⁴ Sango jino jili ngwe chishima: mapwo wano aali kaali ngwe Usendo waali, Usendo umuwika (kafwa ngwe Hagare) uli wa ku mulundu wa Sinai, we ukwete ana ja ndungo.

²⁵ Hagare kalifwa ni mulundu wa Sinai mu chifuchi cha Arabia. Kali ngwe Yerusaleme wa musono, limbo lize liabwa ngwe ndungo hamwe ni atu jalio eswe.

²⁶ Alioze Yerusaleme, limbo lize lia mwilu, liabwa mwenyaho, mwe mama yetu.

²⁷ Mumu hichinasonewa mu Mukanda wa Zambi ngwo: “Wahilila, yena mumba kuushi kusema! Kololoka ni liji lia uwahililo, yena kuwevwile musongo wa kusema! Mumu pwo yoze haanalakula, makabwa ni ana kuhiana pwo yoze uli ku ulo.”

²⁸ Alioze, yenu usoko wami, nuli ana waze nwasemukine nikulita ni chilakenyo cha Zambi, ngwe Isake.

²⁹ Ha miaka yikulu mwana yoze wasemukine nikulita ni ndako ya uutu, yahungumiona yoze wasemukine nikulita ni Mwiku wa Zambi. Chimuwika ni musono.

³⁰ Alioze kuchi Mukanda wa Zambi unambe? Ngwo: “Hanga ndungo hamwe ni mwanenyi, mumu mwana wa ndungo kahashile kuhinga hamwe ni mwana wa mwenyaho.”

³¹ Chenacho, akwetu, hi tuli ana ja ndungo ko, alioze ja mwenyaho.